Вьетнамын хөрөнгийн зах зээлийн толгой баячуудын нэг Труонг Май Лан амиа аврахын төлөө мөнгө цуглуулж эхэлнэ. Дэлхийн хамгийн том банкны луйврын хэрэг үйлдсэн гэж өнгөрсөн дөрөвдүгээр сард хуулийн дээд хэмжээ сонссон 68 настай тэрбээр өнөөдөр шүүхээс цаазын ялыг мөнгөөр дүйцүүлэн наймаалцах санад сонслоо. Ийм тохиолдол түүхэнд маш ховор байдаг бөгөөд Труонг Май Лан бол Вьетнамд эдийн засгийн гэмт хэргээр цаазын ял сонссон цөөхөн эмэгтэйн нэг юм.

Шүүхээс гаргасан хачирхалтай шийдвэрийг тайлбарлавал Труонг Май Лан бусдад учруулсан хохирлын 75%-ийг төлж, барагдуулбал цаазын ялыг хөнгөлж, хорих ялаар сольж болох юм. Вьетнамын тав дахь том зээлдэгч Сайгон арилжааны банкыг далдуур удирдаж, хуурамч банкны нэрээр бүтэн арван жилийн турш олон дахин зээл, бэлэн мөнгө гаргуулсан нь нийт 44 тэрбум ам.долларт хүрчээ. Прокуроруудын мэдээлж буйгаар дээрх дүнгийн 27 тэрбумыг нь зориулалтын бусаар зарцуулсан, 12 тэрбумыг нь хувьдаа завшсан учраас өнгөрсөн хавар цаазын ял оноосон юм.

Тэгэхээр, хувьдаа завшсан 12 тэрбум долларын 75 хувь нь есөн тэрбум доллар. Иймд Труонг Май Лан цаг хугацаатай уралдан есөн тэрбум доллар цуглуулж чадвал амьд үлдэнэ гэсэн үг юм. Товчоор бол шүүх хэрэгтэнг хувьдаа завшсан хөрөнгөө гаргаж өгөх саналыг тойруугаар тавьсан гэж ойлгож болох талтай. Учир нь, үл хөдлөх хөрөнгийн Ван Тин Фат Группийн эзэн байх хугацаандаа буюу сүүлийн 40-өөд жилд олон тооны барилга, байшин, зоогийн газрын сүлжээ худалдан авч байсан учир дээрх хэмжээний мөнгийг гаргаж өгөх чадвартай гэж хуулийнхан үзэж байна.