Хүний наймаа, бэлгийн боолчлол, хар тамхи, хүчирхийлэл, бусдыг дарамталсан гэх мэт олон зүйл ангиар саатуулагдан шүүх хурлаа хүлээж буй алдарт реппер асан Дидди буюу Шон Комбсын хэрэгт холбогдох шинэ гэрч гарч иржээ. Холливуудад нэр хүндтэй загвар зохион бүтээгч Бриана “Бана” Бонголан өчигдөр Лос Анжелосын шүүхэд хандан 17 хуудас бүхий гомдол мэдүүлсэн байна. Шон “Дидди” Комбс нь дизайнер бүсгүйг хүчирхийлж, экс найз бүсгүй Касандра Вентюрагийн амьдардаг байрны 17-р давхрын тагтнаас дүүжилж, амь насанд нь онц аюултайгаар заналхийлсэн тухай шүүхийн баримтанд тодорхой бичсэн байсныг Реорle сэтгүүл дамжуулжээ.

Бриана Бонголан нь тагтнаас дүүжилсэн хэргээс гадна сэтгэл санааны дарамт учруулсан гээд өөр олон хүч хэрэглэн айлган сүлдүүлж, түүнийг зовоож байсан тул сэтгэл санааны хохирол барагдуулах 10 сая ам.доллар нэхэмжилсэн байна. Гомдол мэдүүлэгчид гар хүрсэн хэрэг 2016 оны есдүгээр сард гарсан ч байнгын дарамт үзүүлж байсан тул өнөөг хүртэл чимээгүй явсаар ирсэн гэжээ. Гэвч Диддигийн өмгөөлөгч тийм хэрэг болоогүй гэж эрс үгүйсгэсэн байна.