АНУ-ын Ерөнхийлөгчид сонгогдсон Дональд Трамп өнөөдөр Мета компанийн захирал Марк Цукербергтэй уулзаж, оройн зоог барьсан байна. Тэдний уулзалт Флоридад байдаг Д.Трампын хувийн эдлэн Мар-а-Лагод болсон талаар CBS мэдээлэв. Энэхүү уулзалт нь нэгэн цагт ам муруйж, явсан хоёр эвлэрснийг харуулж байна хэмээн гаднын хэвлэлүүдээр онцолжээ. Фейсбүүкийг үүсгэн байгуулагч М.Цукербург одоогоос гурван жилийн өмнө Д.Трампыг нийгмийн сүлжээний платформоос хөөж, хориг тавьж байсан юм.

Мета компанийн хэвлэлийн төлөөлөгчийн мэдээлснээр М.Цукерберг Дональд Трампын урилгыг хүлээн авч очиж, удахгүй байгуулагдах гэж буй түүний засаг захиргааны гишүүдтэй уулзаж, танилцсан гэлээ. Д.Трампын ажлын хэсгийн дэд даргаар томилогдоод буй Стефен Миллер Мета компанийн захирал бусад бизнес эрхлэгчидтэй уулзаж, ирэх жилүүдэд Д.Трампын эдийн засгийн төлөвлөгөөг дэмжихээ илэрхийлсэн гэв.

“Марк тусдаа сонирхол, эрх ашиг харж байгаа ч гэлээ Трампын удирдлагын хугацаанд Америк орны үндсээр нь шинэчлэх бодлогыг дэмжин ажиллах тухай тэд ярилцсан” гэж С.Миллер цааш нь ярьжээ.

Фейсбүүк компани нь 2021 оны нэгдүгээр сарын 06-нд Нийслэл Вашингтон хот дахь Капитол Хиллд гарсан хүчирхийллийг турхирч, олон нийтийн өдөөн хатгасан гэж буруутган Д.Трампыг сүлжээнээс хасаж байсан юм. Харин 2023 оны эхээр түүний хуучин хаягийг сэргээсэн ч тодорхой хаалтууд тавиад байсныг энэ оны долоодугаар сард цуцалсан юм. Д.Трамп өнөөдрийн байдлаар Фейсбүүк болон Инстаграм хуудастаа нийт 65 сая дагагчтай.

М.Цукерберг өнгөрсөн Ерөнхийлөгчийн сонгуулийн компанит аяны хугацаанд нэр дэвшигч Д.Трампыг дэмжих талаар байр суурь илэрхийлээгүй ч найрсаг харилцаатай хандлага гаргаж байсан юм. Харин Д.Трампын хувьд Фейсбүүк платформыг сонгуулийн луйварчдад боломж олгож байна гэж шүүмжилж, М.Цукерберг рүү олон удаа дайрч довтолж байв.