Шоронд хоригдож буй Пакистаны Ерөнхий сайд асан Имран Ханыг дэмжигчид өчигдөр нийслэлийн төвд хүрч хууль, хүчнийхэнтэй мөргөлдөж, үймээн самуун дэгдээжээ. Мөргөлдөөний улмаас зургаан хүн амиа алдаж, 50 гаруй хүн шархадаад байна. Амиа алдсан хүмүүсийн дөрөв нь хагас цэрэгжүүлсэн албаны албан хаагчид бол үлдсэн хоёр нь эсэргүүцлийн хөдөлгөөнд орлцогчид байжээ.

Сөрөг хүчний удирдагч И.Ханы дэмжигч хэдэн мянган иргэн нийслэл Исламабад хотын хамгийн өндөр хамгаалалттай Д Чоук буюу Ардчиллын талбай руу жагсаалаар явж, экс Ерөнхий сайдыг суллах болон хэд хэдэн нэмэлт шаардлагыг Засгийн газартаа хүргүүлжээ. Мөргөлдөөний үеэр жагсагчид Д Чоук талбайд хүрч чадсан боловч цагдаа, цэргийнхний босгосон төмөр чингэлэгэн хаалтыг ихэнх нь давж чадаагүй байна. Гэхдээ үймээний үеэр төв талбайд нэвтэрсэн хэсэг жагсагчийг цагдаа, аюулгүй байдлынхан хүч хэрэглэн тэндээс гаргаж, байдлыг намжааж чадсан гэв.

Пакистанийн 22 дахь Ерөнхий сайд асан Имран Хан нь өнгөрсөн оны тавдугаар сард авлигын хэргээр баривчлагдсанаас хойш жил гаруй шоронд хоригдож байгаа юм. Тэрбээр өөрийг нь хорьсон явдал бол өрсөлдөгчдийнх нь явуулга бөгөөд улс төрийн зорилготой гүтгэлэг хэмээн мэдэгдээд байгаа билээ.