Австралийн Төлөөлөгчдийн ордон өнөөдөр/2024.11.27/ бага насны хүүхэд сошиал медиа ашиглахыг хориглох хулуийн төслийг дэмжлээ. Ингэснээр тус улсын Сенат хуулийн төслийг соёрхон баталснаар дэлхийд батлагдсан энэ төрлийн хамгийн анхны хууль болж, хүчин төгөлдөр хэрэгжиж эхэлнэ. Тодруулбал, 16 ба түүнээс доош насны хүүхэд интернет дэх олон нийтийн сүлжээний платформуудыг ашиглах хориотой болж байна. ТикТок, Фейсбүүк, Снепчат, Реддит, Икс болон Инстаграм зэрэг платформ залуу үеийнхнийг хэрэглэгчээр бүртгүүлэхээс сэргийлэх системчилсэн арга хэмжээ аваагүй тохиолдолд 50 сая австрали доллараар торгож, хариуцлага тооцох хуулийн төслийг тус улсын томоохон намууд дэмжээд байгаа нь энэ юм.

Хуулийн төслийг Төлөөлөгчдийн ордоны гишүүд 123-13 харьцаатайгаар дэмжжээ. Хэрэв энэ долоо хоногт Сенатын хурлаар орж, батлагдвал платформуудад насны хязгаарлалт тогтоох журмыг бүрэн хэрэгжүүлэх нэг жилийн хугацаа өгнө. Сөрөг хүчний хууль боловсруулагч Ден Теханы мэдээлснээр хуулийн төслийг Сенатад дэмжих нь гарцаагүй бөгөөд сошиал платформууд хуулийн хэрэгжилтийг ёсчлон биелүүлж, хэрэглэгчдээс засгийн газраас олгосон гадаад болон иргэний үнэмлэх, жолоочийн үнэмлэх зэрэг албан ёсны бичиг баримт шаардах эрхтэй болж байгаа юм байна. Гэхдээ тэд төрийн сүлжээгээр дамжуулан дижитал бичиг баримт шаардах хориотой гэнэ.