Олон улсын сансрын станцад хүнс, түлш болон бусад хангамж бүхий гурван тонн ачаа хүргэх даалгавартай очсон ОХУ-ын сансрын нисгэгч станц болон сансрын хөлгийг холбосон хүзүүвчний нээлхийг онгойлгох үеэр хорт хий үнэртэж байгааг анзаарч бусад хамтрагчдадаа анхааруулснаар болзошгүй аюулаас аварсан байна. Өнгөрсөн бямба гарагт Прогресс сансрын хөлгийн хүзүүвчийг нээх үеэр эвгүй үнэр гарч үл мэдэгдэх шингэн бодис дусалж буйг Роскосмосын сансрын нисэгчийн тусламжтайгаар илрүүлж, Пойст модулийн бусад хэсгийг хааж, нэн яаралтай арга хэмжээ авсан гэж НАСА мэдээлэв.

АНУ-ын Хьюстон дахь Агаар, сансрын удирдлагын төвөөс хорт бодис байж болзошгүй эвгүй үнэр гарсан мэдээллийн дагуу сансрын станцын дотоод орчин дахь агаарын чанарыг шинжилж үзэхэд хэвийн хэмжээнд байсан гэнэ. Гэвч russianspaceweb.com зэрэг шинжлэх ухааны танин мэдэхүйн чиглэлээр үйл ажиллагаа явуулдаг цахим хэвлэл, мэдээллийнхний зүгээс НАСА-г ноцтой нөхцөл байдлыг нуун дарагдууллаа хэмээн үзэж, буруушааж буйгаа мэдэгдлээ. Сая дурдсан цахим хуудасны Анатолий Зак сансрын нисэгчид хорт хий байж болзошгүй эвгүй үнэр илрүүлж, Прогресс хөлгийг яаралтай битүүмжлэх арга хэмжээ авсан нь ноцтой байдал үүссэний гол нотолгоо гэв. Мөн ОУСС дахь АНУ-ын сансрын нисэгч Дон Петит шүршдэг будагтай төстэй үнэр ханхалсан гэж мэдээлснийг ч иш болгожээ.

Өмнө нь дээрхтэй ижил үйл явдал нэг бус удаа болж байсан бөгөөд хамгийн сүүлд л гэхэд 2023 оны хоёрдугаар сард Прогресс хөлгийг сансрын станцтай холбох үед хөргүүрийн системийн даралт алдагдсанаас үүдэлтэй байжээ. Тиймээс, НАСА-гийн зүгээс одоо айх зүйл байхгүй гэж мэдэгдээд байгаа юм.

ОХУ-аас Украинд явуулж буй дайны ажиллагаатай холбоотойгоор санхүүгийн хүндрэл үүсэж, ОУСС дахь Роскосмосын хэсэгт техникийн эвдрэл гарах нь олшроод байгаа гэнэ.