Испанийн хилээр 13 тонн хар тамхи давуулахыг завдсан хэрэгтэй холбоотой мөрдөн шалгах ажиллагаа үргэлжилж, гэмт хэрэгтнүүдтэй хамтран ажилладаг байсан цагдаагийн дээгүүр албан тушаалтныг баривчилсан байна. Мөрдөн байцаагчид Милан хотын цагдаагийн газрын санхүүгийн гэмт хэрэгтэй тэмцэх хэлтэсийн дарга Оскар Санчез Гилийн гэрт нэгжлэг хийж, ханаар халхалж нуусан 20 сая евро, албан өрөөндөө нуусан нэг сая евро илрүүлэн хурааж авчээ. Ажиллагааны үеэр түүнээс гадна 15 хүнийг баривчилсны дотор Санчез Гилийн нууц амраг, мөн адил цагдаагийн албан хаагч эмэгтэй байгаа юм байна.

Испанийн Прокурорын газраас хэрэгтнүүдийн гэм буруутайг нотолж, хар тамхины наймаа, авлига, мөнгө угаах гэмт хэрэг, зохион байгуулалттай гэмт хэрэг үйлдсэн зэрэг үндэслэлээр яллахаар төлөвлөж байна.

Испанийн цагдаа, гаалийнхан өнгөрсөн долоо хоногт Эквадороос гадил тээвэрлэж ирсэн усан онгоцноос 13 тонн кокейн илрүүлсэн. Испанийн Үндэсний цагдаагийн газрын мэдээлснээр энэ нь тус улсын түүхэнд их хэмжээний хар тамхи нэвтрүүлэх гэсэн түүхэн дээд тохиолдол бол Европ тивийн түүхэнд хоёрдугаарт бичигдэх тохиолдол аж.

Цагдаагийнхан уг хэрэгтэй холбогдуулан өргөн хэмжээний мөрдлөг явуулж, Испани, Булгар, Нидерланд, Колумб зэрэг улсаас 18 сэжигтэн баривчилж, нэг тонн орчим хар тамхи хураан аваад байгаа юм.