ОХУ-ын Ерөнхийлөгч Владимир Путин өчигдөр буюу арваннэгдүгээр сарын 13-нд Украинд явуулж буй байлдааны ажиллагаанд оролцож буй цэргүүдэд олгох нөхөн олговрын хэмжээг бууруулах зарлигт гарын үсэг зуржээ. Одоогийн байдлаар нөхөн олговрын хэмжээ гурван сая рубль буюу ойролцоогоор 29,000 ам.доллартай дүйх бол шинэ тогтоолын дагуу шархны хүндрэлийн зэргийг харгалзан нэмэлт олговор тогтоодог байсныг зогсоолоо. Ингэснээр В.Путин цэргүүдээ хөсөр хаясан явдал боллоо гэж олон улсын хэвлэлүүдээр шүүмжилж байна.

ТАСС агентлагийн мэдээлснээр шархны зэргийг гурав ангилж байхаар баталсан байна. Хүнд шархадсан бол дээр дурдсан хэмжээний мөнгө, хөнгөн шархадсан бол нэг сая рубль буюу 10,000 долларын нөхөн олговортой. Харин гурав дахь ангилал буюу бусад хөнгөн шарханд 100,000 рубль буюу мянга хүрэхгүй долларын нөхөн олговор олгохооро болж байгаа юм байна. Гэхдээ В.Путиний баталсан зарлигт шархыг хэрхэн ангилах нарийн мэдээлэл огт дурдагдаагүй өнгөрчээ.

ОХУ-ын Батлан хамгаалахын сайд, Андрей Белусов, түүний орлогч Анна Цивилева нар эл шийдвэрийн талаар тайбарлахдаа “Шархадсан цэрэгт олгох нөхөн олговрын хэмжээ өндөр байгаа нь цэргүүдийн дунд ашиг харах хандлага бий болгож байна” хэмээжээ.

В.Путин ийнхүү шархадсан цэргүүдэдээ төмөр нүүр үзүүлсэн ч Украинд дайтахаар элссэн шинэ цэргүүдэдээ олгох мөнгөн урамшууллыг хоёр дахин нэмэв. Шинэ цэрэг өмнө нь 195,000 рубль буюу 2,260 ам.доллар авдаг байсныг нугалж, 400,000 буюу 4,600 ам.долларт хүргэжээ.

Өнгөрсөн аравдугаар сард ОХУ-ын зэвсэгт хүчин Украинд бүрэн хэмжээний дайралт хийж эхэлсэн ч асар их хохирол амссан юм. Их Британийн Батлан хамгаалахын сайд Жон Хэйлигийн мэдээлснээр Москва ганцхан сард 41,980 хүнээ алдсан аж. Гэхдээ хүн, хүчний хохирол ихээр амссан ч зүүн Украин дахь түрэлт нь нэлээд амжилт олсон гэнэ.