Энэ долоо хоногт олон улсад өрнөж буй онцлох үйл явдалын нэг бол Азербайжаны нийслэл Баку хотноо зохион байгуулж буй НҮБ-ын Цаг уурын өөрчлөлтийн чуулган буюу СОР29. Дэлхийн  200 орчим орны төлөөлөл хурсан энэ чуулганаар хэлэлцэж буй нэг гол асуудал бол хатуу түлшний хэрэглээг хоёр дахин багасгах стратеги боловсруулахад чиглэж байгаа юм. Энэ нь байгалийн баялагт суурилан эдийн засгаа улам тэлэх зорилготой Азербайжаны ашиг сонирхолтой зөрчилдөж буй тул барууны зүгээс явуулж буй сайтар зохион байлуулалттай хорлон сүйтгэх, заналхийлэх ажиллагаа юм гэж тус улсын Ерөнхийлөгч Илхам Алиев үзэж байна.

И.Алиев чуулганд тавьсан илтгэлдээ нефть, байгалийн хий бол “бурханы бэлэг юм” хэмээжээ. Тэрбээр цааш нь хэлэхдээ “СОР29 чуулганаас дэвшүүлж буй ногоон эрчим хүчинд шилжих санаачлага нь зөв. Бид ч шилжинэ. Гэвч одоогийн нөхцөл байдлаа харгалзан үзэж, асуудалд бодитой хандах хэрэгтэй байна. Манайх шиг байгалийн нөөцтэй улс орныг буруутгаж болохгүй. Барууны ертөнц одоо ч хатуу түлшнээс хамааралтай хэвээр. Байгалийн нөөцөө зах зээлд гаргах нь буруу явдал биш. Хүмүүст нэн шаардлагатай байна шүү дээ” гэж нэлээд шүүмжлэнгүй байр суурь илэрхийллээ. Түүний тавьсан илтгэлийг ерөнхийд нь авч үзвэл дэлхийн хамгийн их нүүрстөрөгч ялгаруулдаг АНУ, Европын холбооны орнуудыг эрчим хүчний шилжих хөдөлгөөнийг өөрсдөөсөө эхэлж, үлгэр дуурайлал үзүүлэхийг сануулав.