Байгаль хамгаалах үйлсээрээ дэлхий дахинаа алдаршсан Грета Тунберг энэ сарын 11-22-нд Азербайжаны Баку хотод зохион байгуулж буй “COP29” буюу НҮБ-ын Цаг уурын өөрчлөлтийн чуулганд оролцохгүй байхаар шийдсэн. Тэрбээр тус улсын хөрш Гүржид зохион байгуулж буй хүний эрхийн төлөө жагсаалд оролцож байгаа бөгөөд дээрх чуулганыг Бакуд хийж байгаа нь “утгагүй явдал юм” гэж шүүмжилжээ.

Цаг уурын өөрчлөлтийн эсрэг тэмцэхийг хүн төрөлхтөнд уриалж, шахаж шаарддаг тэрбээр НҮБ-ын Цаг уурын өөрчлөлтийн чуулганд гурван жил дарааллан оролцохоос татгалзаад байгаа нь энэ юм.

Гвардиан сонинд гарсан мэдээгээр Г.Тунберг нь НҮБ-ыг цаг уурын өөрчлөлтийн эсрэг олон үйл ажиллагаа явуулж, тэр бүгд үр дүнд хүрсэн гэж мэдээлдэг нь худал, ташаа ба улс орнууд дэлхий нийтийн эрүүл амьдрах орчин, ирээдүйг хамгаалах тал дээр бүтэлгүйтснээ нуухыг оролддог хэмээн хурцаар шүүмжилсэн байна.

Азербайжан нь нефть, байгалийн хий олборлох, ашиглах тал дээр идэвхтэй бодлого баримталдаг тул байгаль орчин хамгаалах зорилготой чуулганыг зохион байгуулах газраар Баку хотыг сонгон авсан нь үйлдэл, яриа хоёр зөрсөн алхам боллоо гэж Грета Тунберг тэргүүтэй байгаль хамгаалагчид үзэж, ийнхүү шүүмжлэлтэй хандаж буй юм.