Ерөнхий сайдын үүрэгт ажлыг аваад зургаахан сар гаруй болж байсан Гарри Кониллийг Гаити улсын эрх барих зөвлөлийнхөн албан тушаалаас нь хөөсөн байна. Ингээд Г.Кониллийн оронд бизнес эрхлэгч, Гаитийн Сенатад нэр дэвшигч асан Аликс Дидьер Филь-Эймийг томилох тухай гүйцэтгэх тушаалд дээрх зөвлөлийн есөн гишүүний найм нь гарын үсэг зурж, баталгаажуулжээ. Угтаа, НҮБ-ын ажилтан байсан Г.Конилль одоо ч үргэлжилж буй зэвсэгт бүлэглэлүүдийн үүсгэн аюулгүй байдлын хямралыг намжааж, 2016 оноос хойш анх удаа Ерөнхийлөгчийн сонгууль зохион байгуулах ажлын замыг засах учиртай хүн байсан юм.

Тэрбээр өнгөрсөн зургаадугаар сарын 03-нд Ерөнхий сайдын тангараг өргөж байв.

Ройтерс агентлагийн дэлгэсэн Г.Кониллийн олон нийтэд хандсан захидлаас үзэхэд экс Ерөнхий сайд тэрбээр албан тушаалаасаа хөөгдсөн явдалыг хууль бус үйлдэл хэмээгээд энэхүү огцом шийдвэрийн улмаас Гаити улсын ирээдүйд санаа зовж байна гэжээ. Гаити улсын үндсэн хуульд зааснаар тус улс нь одоогоор Ерөнхийлөгчгүй, Засгийн газаргүй бөгөөд зөвхөн Засгийн газрын шийдвэрээр л Ерөнхий сайдыг ажлаас нь чөлөөлөх учиртай аж.

Гаитигийн эрх барих зөвлөл буюу Шилжилтийн Ерөнхийлөгчийн Зөвлөлийг өнгөрсөн дөрөвдүгээр сард Г.Кониллийн өмнөх Ерөнхий сайд Арьел Хенри нийслэл Порт О Принс хотын талыг эрхшээлдээ авсан зэвсэгт бүлэглэлүүдийн эсрэг тууштай тэмцэхийн тулд нэгдсэн удирдлага бий болгох зорилгоор байгуулж байсан юм.