Их Британи даяар алдартай тогооч Жейми Оливерийн бичсэн хүүхдийн ном Австралийн уугуул иргэдийн дургүйцлийг төрүүлсэн учраас худалдаанаас буцаан татсан байна. Гвардиан сонины өнгөрсөн бямба гарагийн дугаарт гарсан мэдээллээс үзэхэд Ж.Оливерийн “Жаал хүү ба баатарлаг орголт” ном нь Австралийн уугуул иргэдийн байгаль, сүнслэг ертөнцтэй харилцах харилцааг гутаан хэд, хэдэн маягаар гутаан доромжилсон хэмээн хурцаар шүүмжилж, олон нийтэд түгээн дэлгэрүүлж болохгүй гэж үзэж буйгаа Үндэсний аборгинчүүдийн ба Торрес Стрейт Айлендерийн боловсролын компорациас мэдэгдэж, буцааж татах шаардлага тавьжээ. Тодруулбал, уг уран зөгнөлт номын дэд бүлэгт асрамжийн газар амьдардаг уугуул охины түүхийг өгүүлэхдээ Анхны үндэстнүүдийн ард түмэн хийгээд тэдний аж амьдралыг зэрлэг бүдүүлэг байдлаар дордчилж өгүүлжээ.

Өдгөө 49 настай Ж.Оливер уугуул иргэдийн дургүйцлийг төрүүлсэндээ гүнээ харамсаж, бүх зүрх сэтгэлээрээ уучлалт гуйсан бол түүний хамтрагч Пенгвин Рэндом Хаус нэртэй хэвлэлийн газраас хариуцлага алдсанаа ухаарч шийдэмгий арга хэмжээ авахаар шийдвэрлэж, бусдын нэр төрийг гутаасан номыг худалдаанаас эргүүлэн татахаар болсон гэж мэдэгдэв.

Ж.Оливер нь Австралид шинээр гаргасан хоолны жорын номоо сурталчилж яваа бөгөөд хүүхдийн номын салбарт орсон олон алдартны нэг ч гэлээ хүүхдийн зохиолчдын зүгээс зах зээлийг нь булаацалдаж буйд шүүмжлэлтэй ханддаг юм. Тэрбээр анхны хүүхдийн номоо Билли ба Үлэмж биетний адал явдал нэртэй өнгөрсөн жил гаргасан бөгөөд худалдаанаас буцаан татсан шинэ номоо энэ оны эхээр хэвлүүлсэн юм. Анх 1999 онд Нүцгэн тогооч нэртэй зурагтын нэвтрүүлэг болон хоолны жорын номоор алдаршиж эхэлсэн Ж.Оливер нь 2005 онд Их Британийн дунд сургуулиудын өдрийн хоолны чанарын асуудлыг хөндөж, шим тэжээллэгийг нь сайжруулах хөдөлгөөн өрнүүлж, олонд улам танигдсан нэгэн аж.