Парисын цагдаагийн газар ирэх пүрэв гарагт болох Франц-Израилийн хөлбөмбөгийн тэмцээний харуул хамгаалалтыг чангатгах шийдвэр гаргаж, 4,000 цагдаагийн албан хаагчийг дайчлахаар болсон байна. Мөн тэдэн дээр цэнгэлдэх хүрээлэнгийн 1,600 ажилчин нэмэгдэнэ. Учир нь, өнгөрсөн долоо хоногийн пүрэв гарагт Нидерландын нийслэл Амстердам хотод гарсан Израилийн багийн фанатуудын эсрэг үйлдсэн хүчирхийлэлтэй адил эрсдэл үүсэхээс сэргийлэхэд чиглэж буй юм.

УЕФА-гийн Үндэстнүүдийн лигийн Франц, Израилийн багийн тоглолтыг Францын Ерөнхийлөгч Эммануэль Макрон очиж үзнэ гэж Элизейн ордноос мэдэлсэн байна.

Израилийн Үндэсний аюулгүй байдлын зөвлөлөөс өчигдөр мэдэгдэл гаргаж, хилийн чанадад яваа иргэдэдээ спорт, соёл урлагийн арга хэмжээнд оролцохоос аль болох зайлсхийхийг сэрэмжлүүлжээ. Ялангуяа, Парис хотод болох хөлбөмбөгийн тэмцээнд болгоомжтой хандахыг сануулсан байна.

Харин Парисын цагдаагийн газрын дарга Лорен Ньюнез орон нутгийн БФМ телевизээр ярихдаа “Нөхцөл байдал хурцдах эрсдэл маш өндөр байна. Гэхдээ манай зүгээс аливаа хүчирхийллийг үл тэвчинэ” хэмээжээ. Мөн тэрбээр дээр дурдсан тооны цагдаагийн 2,500-г тэмцээн болох Францын үндэсний цэнгэлдэх хүрээлэн, түүний ойр орчимд тараан байрлуулах бол 1,500 нь Парис хотын нийтийн тээврийн аюулгүй байдлыг ханган ажиллах юм байна. Цэнгэлдэх хүрээлэнг тойруулан терроризмаас сэргийлэх бүс байгуулан түүгээр нэвтрэх хүмүүсийг олон давхар шалгаж, сайтар нэгжиж оруулах гэнэ.