Өнгөрсөн нэг сарын хугацаанд Рафаель, Оскар хар салхинд нэрвэгдэн хүндхэн байдалд ороод байсан Куба улсад дахин байгалийн онц ноцтой үзэгдэл тохиолджээ. АНУ-ын Геологийн ажиглалтын төвийн бүртгэж авснаар тус улсын зүүн эргийн нутагт 6.8 баллын хүчтэй газар хөдлөлт болсон байна. Эхний газар хөдлөлт орон нутгийн цагаар өнгөрсөн ням гарагт Бартоломе Масогоос өмнө зүрт 39 км-ийн зайд болсон бол нэг цагийн дараа хоёр дахь 5.9 магнитутын хүчтэй газар хөдлөлт бүртгэгджээ. Газар хөдлөлтийн улмаас зүүн эргийн нутгуудаар хөрсний гулгаа үүсэж, олон тооны орон сууц нурж, цахилгааны шугам тасарсан бөгөөд хар салхины дараах гамшгийн байдлыг улам хүндрүүлсэн байна. Орон нутгийн онцгой байдлын албаныхан гамшгийн дараах нөхцөл байдалд үнэлгээ хийж, тохирох авран хамгаалах, сэргээн босгох, орон гэргүй хоцорсон иргэдийг хоргодох байраар хангаж, хүмүүнлэгийн тусламж үзүүлэхээр төлөвлөгөө боловсруулж эхэлсэн гэж Кубын Ерөнхийлөгч Мигель Диаз-Канел иргэдэдээ хандан хийсэн мэдэгдэлдээ онцлов. Одоогийн байдлаар Гранма болон Польон гэсэн хоёр муж газар хөдлөлтийн улмаас хамгийн их хохирол амсаад байгаа аж. Газар хөдлөлт хэр хүчтэй байсныг хойд нутгийн Сантиаго, Хольгин, Гуантанамо мужид мэдрэгдсэнээс харж болох юм. Харин нийслэл Хавана хотод чичирхийлэл мэдрэгдээгүй ч гэлээ АНУ-ын Флорида мужийн ойр орчимд мэдрэгдсэнийг албаныхан бүртгэж авчээ.