АНУ-ын Ерөнхийлөгч Жо Байден испани гаралтай иргэдийн эрхийг хамгаалахын төлөө ажилладаг Вото Латино группийнхэнтэй утсаар ярих үеэрээ ээлжит Ерөнхийлөгчийн сонгуульд нэр дэвшигч Дональд Трампын дэмжигчдийг “хог” гэж цолложээ. Тони Хандклифф гэх хошин шогч залуу Пуэрто Риког “Хөвдөг хогны арал” гэж элэглэснийг эш татсан нь ийнхүү “өвгөн”-ийг олны шүүмжлэлийн бай болгосон байна. Тодруулбал, Ж.Байден утсаар ярих үедээ “Миний нүдэнд харагдаж байгаа цорын ганц хог бол түүний/Д.Трамп/ дэмжигчид юм. Тэр латинчуудын хүчинд итгэж буй нь худал хэрэг. Америкчууд тэгдэггүй юм. Бидний хийж, зорьж ирсэн бүхнийг үгүйсгэсэн хэрэг боллоо. Д.Трамп угаас испаничуудыг тоодог ч үгүй. Ашиглах гэж байгаа учраас испаничууд энэ сонгуулиар түүнийг дэмжихээ болих хэрэгтэй.” гэсэн байна.

Утасны ярианы мэдээлэл ил болж, дээрх хурц үгс олны сонорт хүрсний дараа АНУ-ын испани гаралтай иргэд болон нөлөө бүхий хүмүүс улсын тэргүүн нь зөвхөн өөрийн улсын иргэдээр зогсохгүй бүх дэлхийн испаничуудыг доромжилсонд эгдүүцэж буйг олон улсын хэвлэлүүд дамжууллаа. Зарим ажиглагчийн зүгээс Ж.Байдений дээрх үгс сонгуулийн үр дүнд нөлөөлж, Ардчилсан намын нэр дэвшигч Камала Харрисыг ялагдалд түлхэж магадгүй гэж анхааруулав.

Мэдээж хэрэг, Бүгд найрамдах намынхны зүгээс ч гэсэн дээрх доромжлолд хариу барьж байна. Нэр дэвшигч Д.Трампын хувьд 2016 оны Ерөнхийлөгчийн сонгуулийн компанит аяны үеэр Хиллари Клинтоны хэлсэн үгийг дахин сануулж “Хилларийг санаж байна уу? Тэр испаничуудыг үзэшгүй муухай гэсэн. Харин энэ хог гэдэг бүр ч дор юм” хэмээн жиргэжээ.