Украинийн Батлан хамгаалахын тагнуулаас хэрэгжүүлж буй “Хочу жить” буюу “Би амьдармаар байна” төсөл фронтод байлдаж байгаа эсрэг талын цэргүүдэд бууж өгөхийг уриалах суртал ухуулгын зорилготой. Тиймээс Оросын талд байлдаж байгаа Умард Солонгосын цэргүүдийг бууж өгөх эсвэл байлдааны ажиллагаанд оролцохоос аль болох зайлсхийхийг уриалж эхэлжээ.

Төсөл хэрэгжүүлэгчдийн өнгөрсөн лхагва гарагт гаргасан суртал ухуулгын бичиг “Бид В.Путиний дэглэмийг дэмжин манай эсрэг байлдахаар ирсэн Солонгосын ардын армийн цэргүүдэд хандан үйл ажиллагаа явуулна. Та бүгд харийн нутагт амиа алдах ёсгүй. Гэртээ хэзээ ч харьж чадахгүй болсон хэдэн мянган орос цэргийн хувь заяаг бүү давтаач. Бууж өгцгөө! Украин та нарыг халуун хоол, дулаан байраар хангана” гэж эхэлжээ.

Цааш нь уншвал хэдэн мянган орос цэрэг бууж өгөөд дайн дуусах энх цаг ирэхийг хүлээнгээ өдөрт гурван хоолтой, эмнэлгийн халамжинд аятай, тухтай амьдарч байна. Пхеньян хэдэн цэрэг, хаашаа илгээх нь хамаагүй, бид бүгдийг нь хүлээж авна. Украинийн дайны олзлогдогсдын хуарангуудад ямар ч шашин, үзэл бодолтой, аль ч улсын иргэнийг найрсагаар угтан авна гэж төгсгөсөн байна.

Украинийн Батлан хамгаалахын тагнуулын дарга Кырыло Буданов энэ сарын 22-нд The Economist-д өгсөн мэдээллээр ОХУ, БНАСАУ-ын тал 500 офицер, гурван генерал бүхий олон тооны цэрэг фронт руу илгээх. Хариуд нь Москва Пхеньянд санхүү, орчин үеийн технологийн туслалцаа үзүүлж, тус улсын цөмийн хөтөлбөрийг хөгжүүлэхээр тохиролцсон байна. Мөн хэдхэн хоногийн өмнө Өмнөд Солонгосын тагнуулын байгууллагаас Умардын тал 1500 цэрэг дайнд бэлдэхээр илгээсэн талаар мэдээлж байсан билээ.