ХБНГУ-д үйл ажиллагаа явуулдаг нэгэн пиццаны газрын менежер болон сэжиг бүхий этгээдүүдийг баривчилж, их хэмжээний хар тамхи, зэвсэг, бэлэн мөнгө хураан авчээ. Тодруулбал, Дуззельфорд хотын нэгэн пиццаны газар цэсэн дээрх 40 дугаартай пиццаг захиалснаар кокейн болон бусад төрлийн хар тамхи худалдан авах үйлчилгээ үзүүлж байжээ. Тус хотын Цагдаагийн газрын Эрүүгийн хэлтсийн дарга Михаль Граф Фон Молткегийн мэдээлснээр сэжиг бүхий үйл ажиллагааг өнгөрсөн гуравдугаар сард үүргээ гүйцэтгэж явсан хүнсний байцаагч анх анзаарч мэдсэн гэв. Хар тамхитай тэмцэх хэлтсийнхэн ажиглалт явуулахад тус газрын 40 дугаартай пицца хамгийн эрэлттэй байсан нь сэжиг төрүүлжээ. Ингээд тухайн сардаа тусгай албаныхан баривчилгаа явуулж, пиццаны газрын менежерийн гэрт нэгжлэг хийхээр дайран орох үед сэжигтэн ууттай зүйл цонхоор шидсэн боловч доор зогсож байсан цагдаа нарын гар дээр унаж, 1.6кг кокейн, 400гр каннабис, 268,000 евро гарч ирснийг нотлох баримтаар хураан авсан байна. Гэтэл хоёр хоногийн дараа менежер пиццаны газраа дахин нээж, 40 дугаартай пиццагаа үргэлжлүүлэн зарснаар хар тамхиар хангадаг сүлжээг илрүүлжээ. Нийт 150 албан хаагч оролцсон өргөн хүрээтэй ажиллагааны үр дүнд 20 гаруй хүн баривчилж, Мюнхенгладбах, Солинген хотын ойролцоогоос олсны ургамал тариалдаг 360 гаруй талбай илрүүлжээ.