Дэлхийд алдартай Их Британийн “One Direction” хамтлагийн гишүүн асан Лиам Пейн 31-хэн настайдаа амиа алдсан харамсалтай хэрэг саяхан гарсан. Энэ сарын 16-нд гарсан дуучны үхлийн шалтгааныг зочид буудлын гуравдугаар давхрын тагтнаас унасан гэж анх мэдээлсэн. Харин өнөөдрийн байдлаар дуучны цогцост хийсэн задлангийн хариуг Аргентинийн Үндэсний прокурорын газраас танилцуулж, дуучин хэрхэн нас барсан болоод юуны учир олон тооны шарх олсон талаар тайлбарлалаа.

Тэгэхээр Лиам Пейн юуны учир нас барав? Хэрэг гарсан Аргентин улсын Эмнэлгийн яаралтай тусламжийн төвөөс орон нутгийн Телемундо телевиз буюу NBCUniversal-ийн салбар сувагт Л.Пейнийн үхлийн талаар дараах байдлаар мэдэгджээ:
“Их Британийн хөгжимчин, хөгжмийн зохиолч, гитарчин, “One Direction” хамтлагийн дуучин асан Лиам Жеймс Пейн өнөөдөр Палермо дахь зочид буудлын гуравдугаар давхрын тагтнаас унаж амиа алдлаа. Энэ өдрийн үдээс хойшх цагаар 14Б хэсгийн цагдаагийн ажилтан мансууруулах бодис, согтууруулах ундааны нөлөөнд автсан байж болзошгүй, түрэмгий эрэгтэй хүн 911 шугамд дуудлага өгсний учир хэргийн газарт очиж шалгасан гэжээ. Прокурорын албанаас уг дуудлага нь Пейнийн үхлээс хэдхэн минутийн өмнө ирсэн гэсэн ч тэр хүн нь Лиам Пейн мөн байсан эсэхийг тодорхой мэдээлсэнгүй. Ассошейтед Пресс агентлагийн дамжуулсан Буэнос Айресын Аюулгүй байдлын албаны мэдэгдэлд “Л.Пейн нь байрлаж байсан зочид буудлын өрөөний тагтнаас үсэрсэн. Түргэн тусламжийнхан амь хохирогчийг олон тооны хүнд шархтай байсан бөгөөд газар дээрээ амьсгал хураасан” гэж байна.

Аргентинийн Үндэсний Прокурорын газраас Л.Пейнийн цогцост хийсэн задлан шинжилгээний хариуг TODAY.com дараах байдлаар нийтэлжээ. Лиам Пейн нь гадаад болон дотуур цус алдаж, “политраума”-гаар нас барсан гэв. Прокурорууд түүнийг эргэлзээтэй, тодорхойгүй байдлаар амиа алдсан гэсэн нь үхлийн шалтгааныг тодорхойлон хэлэх боломжгүй гэсэн үг аж. Гэхдээ Пейнийг нас барсны дараа хэргийн газар ажилласан шүүх шинжилгээний багийнхан зочид буудлын өрөөнөөс нь олон тооны сэтгэцэд нөлөөлөх бодис, согтууруулах ундааны зүйлс хурааж авсан байна. Л.Пейн өмнө нь мансууруулах бодис хэрэглэж байсан түүхтэй.

Задлан шинжээчид талийгчийн цогцосноос өндрөөс унаснаас үүдэлтэй байж болох 25 гэмтэл илрүүлжээ. Үүнээс үхэлд хүргэсэн гол шалтгаан нь тархи болоод гавлын ясны хүнд зэргийн бэртэл гэж үзсэн байна. Гавал, цээж, хэвлий, үе мөчинд олсон шархнаас гадаад болон дотуур цус алдалт үүссэн нь ч үхэлд хүргэх гол хүчин зүйлд тооцогдоно гэжээ.

Дуучин тагтнаас унах үедээ ганцаараа байсан бөгөөд сэтгэцэд нөлөөлөх бодисын нөлөөнд автсаны улмаас сэтгэл санааны хямралд орсон нь түүнийг тагтнаас түлхсэн гэж задлан шинжээчид дүгнээд байгаа юм байна. Мөн тэд дуучны гарын хумсанд үзлэг хийхэд нас барахын өмнө бусадтай тэмцэлдэж, ноцолдсон ул мөр илрээгүй. Цогцост үүссэн бүхий л шарх нэгэн зэрэг бий болсон бөгөөд гурав дагч этгээдийн нөлөө орсон гэх шинж тэмдэггүй. Иймд дуучны үхэлд гаднын нөлөө ороогүй гэж албаныхан эхний байдлаар үзэж, хэргийг үргэлжлүүлэн шалгаж байгаа аж. Мөн шалгалтын хүрээнд дуучныг амиа алдахаасаа өмнө хэр хэмжээний согтууруулах ундаа хэрэглэснийг тогтоохоор цусны дээж аван холбогдох албаныханд нь өгч хариу хүлээж байгаа юм байна.

Цагдаагийнхан таван гэрчээс мэдүүлэг авчээ. Тэдний гурав нь зочид буудлын ажилчин бол үлдсэн хоёр нь Л.Пейнийг нас барахаас хэдэн цагийн өмнө зочид буудлын өрөөнд нь хамт байсан. Гэхдээ түүнийг тагтнаас үсрэх үед байгаагүй хоёр эмэгтэй аж. Эцэст нь, товчхон дүгнэхэд Лиам Пейнийг амиа алдах үед хөндлөнгийн этгээд байсан эсэхийг тодорхойлох нь шалгалтын гол зорилго боллоо гэж Аргентинийн Үндэсний прокурорын газраас мэдээлжээ.