Өнгөрсөн оны наймдугаар сараас хойш ор сураггүй болсон Украинийн сэтгүүлч эмэгтэй Виктория Рощина энэ оны есдүгээр сард ОХУ-ын шоронд нас барсан гэж холбогдох албаны хүмүүс өчигдөр мэдээллээ. Дөнгөж 27 настай байсан В.Рощина нь жил гаруйн өмнө Орост эзлэгдсэн Украинийн нутаг дахь иргэдийн аж амьдралыг сурвалжлахаар яваад хэдэн сарын турш сураг тасарсан юм. Украинийн Прокурорын Ерөнхий газрын мэдээлснээр сэтгүүлч бүсгүй Оросын шоронд дайны олзлогдогсдын хамт хоригдож байгаа гэх сургийг Москвагаас гаргаж, ар гэрийнхэнд нь мэдэгдэж байжээ. Харин өчигдөр гаргасан эрх баригчдын мэдээллээр ОХУ-ын тал сэтгүүлчийг нас барсан гэж мэдэгдсэн ч үхлийн шалтгааныг тайлбарлаагүй аж. Гэвч Украинийн хэвлэлийнхэн жилийн өмнө цоо эрүүл байсан В.Рощинагийн үхэл бол аллага гэж ОХУ-ын эрх баригчдыг шууд буруутгаж байна. Учир нь, оросууд олзолсон, баривчилсан хүмүүсийг цэрэг, энгийн иргэн гэж ялгалгүй зүй бус харьцаж, тамлан зовоож, амь насанд нь халддагийг батлах олон баримтанд үндэслэж буйгаа тэд хэлэв. Хүний эрхийн байгууллагуудын мэдээлж буйгаар 2024 оны долоодугаар сарын байдлаар Украинийн 14,000 энгийн иргэн Оросын олзонд байгаа. Тэдний зарим нь 2014 онд ОХУ Крымын хойгийг булаан эелэх үеэр олзлогдсон хүмүүс гэв.