Олон улсын сансрын станцад үүрэг гүйцэтгэж буй сансрын нисгэгчид энэ долоо хоногт СпейсИкс компанийн сансрын хөлгөөр эх дэлхийдээ эргэн ирэх хуваарьтай байжээ. Гэтэл яг одоо Атлантын далайд дэгдэж буй хүчтэй хар салхины улмаас эргэж ирж чадахааргүй болж, тодорхойгүй хугацаагаар байрлалдаа үлдэхээр болов. Хэдий тийм ч НАСА цаг агаарын нөхцөл байдлыг харгалзаж, энэ сарын 13 гэхэд дөрвөн сансрын нисгэгчээ буцаан авч ирэхээр ажиллаж байгаа. “Крью-8” багийн дөрвөн сансрын нисэгчийг дэлхий дээр газардах үед Мильтон хар салхи Флорида мужийн нутагт хүрэх бөгөөд газардахаар төлөвлөсөн цэгт цаг уурын хүчин нөлөөгөөр ямарваа нэгэн осол эндэгдэл гарахаас сэргийлж, дээрх шийдвэрийг гаргасан гэж тайлбарлалаа. Бүр тодруулбал Кейп Канавералаас 230 гаруй км-ийн зайд орших Кеннедигийн нэрэмжит цойлуур хөөргөх төв дөрөвдүгээр зэрэглэлийн Мильтон хар салхинд өртөх магадлал хамгийн өндөр байгаа аж. Хар салхины нөлөөгөөр бас нэгэн ажил хойшилсон нь НАСА, СпейсИкс компанийн хамтарсан төсөл. Далай вангийн нууцлаг сар руу илгээх судалгааны хиймэл дагуулын Европа Клиппер төслийг эхлүүлэх төлөвлөгөөт хугацаа энэ долоо хоногийн пүрэв гарагт байсан юм.