Их Британийн нэгэн гэр бүлд санаанд оромгүй хачирхалтай явдал тохиолджээ. Тэд долоон настай хүүдээ гадаад пасспорт авах өргөдөл гаргасан боловч “Скайуолкер” хэмээх нэрээс нь болж, татгалзсан хариу өгсөн байна. Нью Йорк Постод гарсан мэдээллээс үзвэл зэвсэгт хүчинд алба хаадаг Кристиан Моубрэйгийн хүү 2017 оны тавдугаар сарын 04-нд буюу алдарт “Оддын дайны өдөр” мэндэлснээс энэхүү хачирхалтай явдал тохиолдоод байгаа юм. К.Моубрэй эл өдөр мэндэлсэн хүүдээ Локи Скайуолкер Моубрэй буюу дэлгэцийн урлагийн домогт бүтээлийн хамгийн алдартай дүрийн нэг Аннакин Скайуолкерын нэрийг хайрласан аж. Моубрэйн гэр бүл ирэх аравдугаар сард Бүгд Найрамдах Доминикан улс руу аялахаар төлөвлөж, хүүхдэдээ гадаад пасспорт захиалах өргөдөл гаргах хүртэл тэдний амьдралд ямар нэгэн бэрхшээл огт тулгарч байгаагүй гэнэ. Гэтэл гадаад пасспорт олгох эрх бүхий байгууллага Их Британийн Иргэний бүртгэлийн газраас Скайуолкер хэмээх нэр нь Дисней компанийн оюуны өмчид бүртгэлтэй байдаг тул гадаад пасспорт олгохоос татгалзаж, Дисней компаниас уг нэрийг ашиглах зөвшөөрөл хүсэх эсхүл хүүхдийнхээ нэрийг соль гэдэг шаардлага тавьсан байна. Аргаа барсан эцэг Кристиан Моубрэй хэвлэлийнхэнд ярихдаа “Албаны шаардлагыг ойлгож байгаа боловч орчин цагийн нэрс хувьсан өөрчлөгдөж байгааг харгалзан үзэх хэрэгтэй шүү дээ” хэмээжээ. Гэхдээ талууд ойлголцсоны үндсэн дээр долоон настай Локи Скайуолкер хүүд гадаад пасспорт олгож, гэр бүлээрээ аялахаар болсон гэж ВВС мэдээлэв.