Арабын хойгт нийт 600,000мкв талбай эзлэх асар том элсэн цөл байх агаад түүнийг “Хоосон нутаг” хэмээн нэрлэдэг. Гэвч хиймэл оюун ухааны хувьд эсрэгээрээ. Харин ч Руб Аль Калигийн умард захын элсэн доор нууц оршиж буйг заасан байсан. Абу Дабигийн Калифа их сургуулийн судлаачид асар том, эзэнгүй, хэт хуурай нутгаас археологийн малтлага явуулж болохуйц газруудыг нэгжих өндөр технологийн хиймэл оюун ухаант машин бүтээж, хөгжүүлжээ. Археологичид газрын байдлыг ажиглаж, судалгаа явуулсны үр дүнд малтлага хийх газраа тодорхойлдог байсан нь цаг хугацаа алдсан хүнд хэцүү ажил байлаа. Тэгвэл сүүлийн хэдэн жилд Google Eath зэрэг дэлхийн газрын зургаас оптик хиймэл дагуулын зураглалд тулгуурлан эртний хот, суурингуудын балгадыг олж, тодорхойлдог болсноор мэргэжилтнүүдийн хөдөлмөрийг хөнгөвчилж өгсөн. Гэхдээ цөлийн элсэн дор дарагдсан археологийн талбарыг ийм аргаар илрүүлнэ гэдэг тун хэцүү. Дээр дурдсанчлан Халифагийн их сургуулийн эрдэмтдийн хөгжүүлсэн машин нь SAR буюу Синтетик Апартурын Радараар цуглуулсан мэдээллээс суралцах алгоритмтай юм. Өөрөөр хэлбэл өвс ургамал, хөрс, мөс, элсэн дор дарагдсан биетийг радио долгион илгээх замаар тодорхойлдог хиймэл дагуулын зураглалын технологи гэж ойлгож болно. SAR технологи нь аль 1980-аад онд анх бий болсон бол өөрөө суралцдаг машинтай нэгтгэснээр археологийн салбарт тоомохон үсрэлт гаргалаа гэж Халифа их сургуулийн судлаач эрдэмтэн Диана Францис онцолжээ. Хайгч машины алгоритмд 5,000 жилийн өмнө хүн амьдарч байсан гэх Дубай хотын гадна орших эртний суурингийн мэдээллийг оруулахад суурингийн ихэнх хэсэг элсэн дор булаатайг зааж өгсөн байна. Мөн уг машин нь газрын гадаргаас 50см-ийн гүн хүртэл гурван хэмжээст загварчлал боловсруулж, чухам юу тэнд нуугдаж буйн зургийг гаргаж өгдгөөрөө онцлог давуу талтай аж.