Кока Кола компани залуу үеийнхнийг татах зорилгоор гаргасан шинэ бүтээгдэхүүн халуун ногооны амттай ундаа гаргасан ч тун тааруухан амжилт үзүүлж, дэлгүүрийн лангуунаас эргүүлэн татахаар шийдвэрлэсэн байна. Гэсэн ч тус компани албан ёсны мэдэгдэлдээ “Кока Кола цаг үргэлж хэрэглэгчдийнхээ таашаалд нийцүүлэн шинэ бүтээгдэхүүн гаргасаар байна. Тиймээс хэрэглэгчдэд хүрэх стратегийн дагуу халуун ногооны амттай цоо шинэ бүтээгдэхүүнээ 2025 онд танилцуулна” гэжээ.

Халуун ногооны дарвигнасан амттай “Coca Cola Spiced” зах зээлд богино насалсан нь хэний ч санаанд оромгүй явдал боллоо. Учир нь, компанийн зүгээс уг бүтээгдэхүүнээ залуу хэрэглэгчдийн тогтмол хэрэглээ болох “мөнхийн амт” гэж сурталчилж байсан билээ. Угтаа энгийн колаг бөөрөлзгөнийн амтаар баяжуулсан бүтээгдэхүүн нь залуу үеийнхэн буюу Зи үеийнхнийг татах зорилготой байсан юм. Кока Колагаас гадна Олипоп, Поппи зэрэг ундааны аваргууд ижил төрлийн бүтээгдэхүүн нь зах зээлд хол яваагүй учир эргүүлэн татахаар шийдвэрлэсэн талаар ч мэдээлж байна.