Азийн орны иргэд АНУ, Канадад цагаачлахын тулд Өмнөд Америкийн орнуудыг ашигладаг болоод удаж байгаа. Онолын хувьд Латин Америкийн орнуудад дүрвэснээр дээрх хоёр улсад цагаачлах боломжтой болдог бөгөөд Бразилд дүрвэгчдийн тоо бусад оронтой харьцуулахад хамгийн өндөр. Ийм учраас тус улсын Засгийн газраас Азийн дүрвэгчдэд чиглэсэн шинэ бодлого хэрэгжүүлэхээр төлөвлөсөн талаар өнгөрсөн долоо хоногийн лхагва гарагт мэдээлсэн. Уг бодлого энэ даваа гараг буюу 2024 оны есдүгээр сарын 23-наас хэрэгжиж эхэлж байгаа юм. Энэ нь гол  төлөв Бразил улсад орогнох визний хугацаа сунгахаар мэдүүлсэн гадаадын иргэдэд хамааралтай гэж ойлгож болох юм байна. Бразилийн Холбооны цагдаагийн газрын явуулсан шалгалтаар цагаачид Сан Пауло хотоор дамжин өнгөрөх тийз худалдан аваад газардсан хойноо тус онгоцны буудалд удаан хугацаагаар байрлах хүсэлт гаргаж, улмаар умардыг чиглэх аялалдаа бэлддэг нь тогтоогдсон гэж Хууль зүйн яамнаас нь мэдээлжээ. Ийм хүсэлт гаргадаг гадаадынхны 70%-ийг Энэтхэг, Непал, Вьетнамын иргэд эзэлдэг байна. Харин өнөөдрөөс хэрэгжиж эхэлж буй бодлогын дагуу дамжин өнгөрөхөөр ирсэн буюу удаан хугацааны визгүй Азийн орнуудын иргэд нэн даруй өөр чиглэлд нисэх эсвэл эх орон руугаа яаралтай буцах шаардлагатай болно. Бразилийн хууль хяналтынхан ийм шийдвэр гаргаснаа дүрвэгчдийн улмаас тус улсын томоохон хотуудын онгоцны буудлуудын ачаалал хэтэрч үймээн самуун дэгдэх нь тогтмол үзэгдэл болсонтой холбон тайлбарлажээ. Мөн Сан Пауло хотын онгоцны буудлаас шууд Амазон мөрний ширэнгээр дамжин АНУ, Канадыг чиглэн дүрвэх тохиолдол олон, энэ хэрээрээ ширэнгэн ойн хүнд хэцүү нөхцөлд амь насаа алдах явдал нэлээд гардаг учир сэргийлэх арга хэмжээ авсан нь энэ юм.