Дидди буюу өмнө нь Пафф Дедди, П.Дидди зэрэг тайзны нэрээр явдаг байсан дэлхийн хөгжмийн магнат Шон “Дидди” Комбс өнгөрсөн нэг жил орчмын хугацаанд хүчирхийлэл, хүний наймааны хэрэгт холбогдож, арав гаруй зүйл ангиар шүүхэд дуудагдаж, энэ долоо хоногийн эхээр баривчлагдсан билээ. Прокурорууд түүнийг бизнесийн нэр нөлөөгөө ашиглан хорь гаруй жилийн турш зохион байгуулалттай гэмт хэрэг толгойлсон хэргээр буруутгасны дотор бэлгийн мөлжлөг, албадан хөдөлмөр эрхлүүлэх, хүний хулгай, эмэгтэйчүүдэд махбодын хүчирхийлэл үзүүлэх зэрэг багтаж буй юм. Дидди өнгөрсөн мягмар гарагт өөрт нь тулгасан бусдыг айлган сүрдүүлэх, бэгийн мөлжлөг, бусдын биеийг үнэлүүлэхээр тээвэрлэсэн зэрэг хэрэгт буруугүй гэж мэдэгдсэн билээ. Гэхдээ түүний гэм буруутайг шүүхээс тогтоовол бүх насаар нь хорих ял оноох төлөвтэй байгаа юм. Шон Комбсын олон тооны гэмт үйлдлийг нотлох гэрч олноор гарч ирж, холбооны мөрдөн шалгах ажиллагаанд хамтарсан учраас өнгөрсөн гуравдугаар сард тусгай албадынхан алдарт дуучны Лос Анжелес, Майями дахь гэрт гэнэтийн нэгжлэг хийж байв.
Хүн сонсоод чихэндээ ч итгэмээргүй хэргийн талаар анх олон нийтэд мэдээлж, хууль шүүхийнхэнтэй орооцолдож эхэлснээс хойш Диддийг Ховардын их сургуулийн хүндэт зэргээс хасах, хандиваар өгсөн нэг сая долларыг буцаан олгох, Нью-Йорк хотын захиргаанаас түүнд бэлэглэсэн хотын бэлгэдэл алтан түлхүүрийг хураах зэргээр олон нийтийн зүгээс хариуцлага тооцсон хэд хэдэн тохиолдол гарсан юм. Өнгөрсөн 11 сарын хугацаанд Диддигийн гэм буруутайг батлах олон гэрч гарч ирсний дотор өнөө ч сая, сая хүний анхаарлыг татсаар байдаг урлагийн алдартнууд байгаа гэнэ.