Албан ёсны тоон баримтаас харахад БНХАУ-ын хэмжээнд шинээр гэрлэгсдийн тоо жилээс жилд буурсаар оргилдоо хүрээд байна. Тухайлбал, 2013 онд 13 сая хос шинээр гэрлэсэн бол 2022 оны байдлаар долоон сая болж, огцом буурчээ. Энэ нь 1985 оноос хойшх хамгийн доод үзүүлэлт юм гэж БНХАУ-ын Үндэсний статистикийн товчооноос мэдээлжээ. Хэдийгээр өнгөрсөн жил бага зэрэг өсөж шинээр гэрлэсэн хосын тоо найман саяд хүрсэн ч эрх баригчдын сэтгэлийг зовоосон хэвээр байгаа юм. Үүний сацуу гэрлэлтээ цуцлуулж, гэр бүл салах явдал огцом өссөн байна. Албан ёсны мэдээллээс харахад сүүлийн хорь гаруй жилийн хугацаанд гэрлэлтээ цуцлуулагсдын тоо дөрөв дахин өсөж, 2019 онд 4.7 саяд хүрсэн нь дээд амжилт тогтоож байв. Хятадын Засгийн газраас энэ үзүүлэлтийг бууруулах үүднээс 2021 онд гэрлэлтээ цуцлуулах хүсэлтэй хосуудад эвлэрэх 30 хоногийн хугацаа олгох хууль баталж, гэр бүл салах явдал түр хугацаагаар буурсан ч дахин нэмэгдэж, 2023 онд өмнөх жилийнхтэй харьцуулахад 25%-иар өссөн үзүүлэлттэй байв. Дээрх хоёр үзүүлэлт ийн огцом өссөн нь эдийн засгаараа дэлхийд хоёрдугаарт бичигддэг тус улсын хувьд хүн амын хямрал үүсгэж, эдийн засаг удаашрахаас гадна настай иргэдийн тоо хурдацтай өсөж, залуу бүсгүйчүүд хүүхэд төрүүлэх нь цөөрчээ. Социологчдын тэмдэглэснээр Хятадын залуу үеийнхэн эрх чөлөө, ажил мэргэжлийн замнал хөөхийг илүүд үзэх болсон нь шинээр гэрлэгсдийн тоо цөөрөхөд хүргэсэн бололтой. Хэрүүл уруултай гэр бүлд амьдрахын оронд ганцаар аз жаргалтай амьдрах нь хамаагүй дээр гэж хятад залуус үзэх болсныг ч эрдэмтэд онцолж байна. Ажлын байрны хэт ачаалал, өрсөлдөөн ихтэй хөдөлмөрийн зах зээл, амьжиргааны өндөр өртөг зэрэг эдийн засаг, нийгмийн хүчин зүйлсийн нөлөөгөөр Хятадын залуусын амьдрал өнөөгийн байдалд хүрсэн гэж дүгнэж болох аж. Гэр бүл салах явдал өссөнтэй холбоотойгоор хуримын дурсамж ёслол төгөлдөр устгах үйлчилгээ БНХАУ-ын томоохон хот суурин газруудад бий болжээ. Жишээлбэл, Хенань мужийн нэгэн үйлдвэрт уг үйлчилгээг үзүүлдэг бөгөөд үнэ ханш нь 8-28 долларын хооронд хэлбэлзэж байна. Тус үйлдвэр 2021 онд байгуулагдсанаас хойш өнөөдрийн байдлаар 2500 гаруй хосын хуримын дурсамжийг мөнхөлсөн гэрэл зураг гэх зэрэг зүйлсийг устгажээ.