Болгарын гүнж Калина өнгөрсөн тавдугаар сарын 29-нд нөхөр Антонио Хосе Мюньоз Валкарсел болон хүү Симеон-Хассан Мюньоз нарын хамт оршуулгын ёслолд оролцох үеэрээ интернет даяар шуугианы бай болсон. Өдгөө 52 настай гүнжтэн 2020 оны нэгдүгээр сараас хойш буюу дөрвөн жилийн хугацаанд анх удаа олны өмнө гарсан ч гадаад үзэмжээсээ болж, тийн элдвээрээ хэлүүлсэн юм. Интернет дахины эрүүг мултлах шахсан нь түүний эрэгтэй хүнийх мэт булчин зангирсан гар байв. Тэрбээр интернетээр шуугисан өөрийнх нь зургийн талаар тайлбар хийж, мэргэжлийн тамирчин бөгөөд тогтмол хүндийн бэлтгэл хийдэг учраас булчингийн хөгжил хэт явагдсан гэжээ.

Гүнжтэн олны эрүүл мултлах шахсан нь анхны тохиолдол биш. Анх 2000 оны эхээр нүүрэндээ нэлээд том хэмжээний гоо сайхны засал хийлгэж, гадаад төрхөө эрс өөрчилж байсан түүхтэй. Лондонд шүдээ янзлуулах үеэр хамрын хөндийд нь халдвар тархсанаас эрүүл мэндийн шалтгаанаар хагалгаа хийлгэх болсон байна. Гэхдээ нөхрийнх 2018 онд хийсэн тайлбараас үзэхэд Калина багадаа ноцтой осолд орсны улмаас царай зүсээ янзлуулах шаардлага гарсан гэдэг.

Калина гүнж нь Болгарын хаан Симеон, хатан Маргарита нарын тав дахь хүүхэд, цорын ганц охин аж. Мөн тэрбээр урлагт маш их сонирхолтой. Лондоны их сургуулийг урлагийн түүхийн мэргэжил эзэмшсэн гэнэ.