![](/uploads/middle/shugeluleegch-mn-img-17188675621.jpg)
Дани, Английн тоглолт энэ хэсгийн хувь заяаг үндсэндээ шийднэ. Данийн хувьд эхний тоглолтоо Словенийн эсрэг хийж эхний гоол оруулж хяналтдаа байлгасан ч гоол алдаж тэнцээгээр өндөрлөсөн. Харин энэ тэмцээний гол фаворитуудын нэг Английн шигшээ Жюд Беллингэмийн гоолын ачаар 1-0 гэсэн даруухан оноогоор ялалт байгуулж бүтэн оноогоо авсан юм. Хоёр улс түүхэндээ 24 удаа таарч тоглосноос 14-т нь Англичууд ялж, тавд нь Даничууд ялалт байгуулжээ. Харин таван тоглолт эвийн гэрээгээр өндөрлөсөн байна. Англи улс энэ тэмцээнүүдэд нийт 41 гоол оруулсан бол Данийн шигшээ 24 гоол оруулжээ.
ДАНИ
Данийн хувьд тэмцээнийг уг нь өөдрөг эхлүүлсэн. Кристиан Эриксений гоолоор тэргүүлж эхэлсэн боловч сүүлдээ Словенийн шигшээ гоол оруулж эвийн гэрээгээр өндөрлөсөн билээ. Хэрэв тэд эхний тоглолтод бүтэн оноотой ирсэн бол хувь заяа нь арай өөр байх байлаа. Хамгийн сүүлд тэд “Евро 2020” тэмцээний хагас шигшээд Английн багтай хийж үндсэн цагт 1-1 оноогор тэнцэж, нэмэлт цагт 2-1 онооны харьцаагаар ялагдсан билээ. Данийн хувьд бүх тэмцээнийг оролцуулаад сүүлийн таван тоглолтд хоёр тэнцэж, гурав ялжээ. Энэ хугацаанд тэд найман гоол оруулж, ердөө гурван гоол хаалгандаа алдсан байна. Хэрэв тэд энэ формоо хадгалж чадвал ядахдаа хагас оноог ч болов хүчтэй өрсөлдөгчөөсөө зулгааж чадах юм.
АНГЛИ
![](/userfiles/files/England.jpg)
Өнгөрсөн тэмцээний аман хүзүү, энэ тэмцээний гол фаворит баг бол яах аргагүй Англи. Тэд эхний тоглолтдоо Жюд Беллингэмийн цор ганц гоолоор бүтэн оноо авч чадсан. Хэдийгээр бүтэн оноо авч чадсан ч Английн хэвлэлүүд шүүмжлэлтэй хандсан. Хэрэв өнөө шөнө Харри Кейн болон бусад үүргийн тоглогч сайн байж чадвал олон гоолтой тоглолт харж мэдэх юм. Данийн шигшээд Кристиан Эриксен бий. Английн премьер лигт олон багт тоглож, энд тоглож буй бүх тоглогчтой таарч явсан учраас Данийн шигшээг дутуу үнэлж болохгүй. Англий шигшээ баг бүх тоглолтыг оролцуулаад сүүлийн таван тоглолтоос хоёр ялж, хоёр хожигдон, нэг тэнцсэн орон гаран формтойгоор Данийн шигшээтэй тоглох гэж байна. Тэд энэ хугацаанд зургаан гоол оруулж, дөрвөн гоол хаалгандаа алджээ. Хэрэв энэ формоос харвал өнөөдрийн тоглолтод тийм ч олон гоол харахгүй нь магадгүй 1-0 юм уу 2-1 онооны харьцаагаар ялалт байгуулж мэдэх юм.
![](/userfiles/files/EngDen.jpg)
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.