БНХАУ-ын удирдагч Ши Жинпин АНУ-ыг талыг буруутгасан талаар Financial Times мэдээлж, уг асуудлын талаар учир мэдэх хүмүүсийн хэлсэн үгсийг эш татжээ. Тодруулбал, Вашингтоны зүгээс Бээжинг өдөөн хатгаж, урхинд унагаж, Тайванийг эзлүүлэх явуулга хийж байна гэж Ши Жинпин америкчуудыг буруутгажээ. Өнгөрсөн оны дөрөвдүгээр сард Ши Жинпин Европын хорооны Ерөнхийлөгч Урсула Фон Дер Лэентэй уулзах үеэр тийнхүү мэдэгдсэн ч албан ёсны мэдээлэлд тэр талаар дурдаагүй аж. Мөн тэрбээр Хятадын албаныханд анхааруулж, бэлэн байдалд шилжихийг даалгасан гэх ч мэдээлэл байгаа юм байна. Уг уулзалтын үеэр хэвлэлээр гарсан мэдээлэлд Ши Жинпин Тайвань бол Хятадын гол сонирхол бөгөөд тус улс Тайваньд баримталдаг бодлогоо орхиж, бууж өгнө гэдэг бол хоосон мөрөөдөл юм гэж цохон тэмдэглэж байжээ. Гэхдээ АНУ-ын талаас хэчнээн өдөөн хатгалга хийсэн ч Бээжин өгөөшийг үмхэхгүй гэж тэр хэлсэн байна.

Энэ талаарх асуудал олны анхаарлын төвөөс гадуур орхигдсон учир Business Insider-ийнхан жилийн өмнөх явдалыг дахин сануулсан нь энэ аж. 

АНУ-ын талаас хэдэн арваны турш Тайванийг чиглэсэн стратегийн бодлого баримталж, хамгийн тууштай хамтрагчаар нэрлэж, Хятадын цэрэг тус бүс нутагт халдсан тохиолдолд бүхий л чадлаараа хамгаална гэж мэдэгдсээр ирсэн. Гэхдээ Вашингтон дахь уг хандлага бага зэрэг өрчлөгдөж, Конгресс хэдхэн жилийн өмнөөс л Тайваньд илүү их дэмжлэг үзүүлэх бодлого барьж эхэлсэн гэж Евразиа группийн аналист Грийм Томпсон өнгөрсөн оны арваннэгдүгээр сард Business Insider-т ярьж байв. Харин өнгөрсөн сард Хятадын тал Тайванийн арал орчимд цэргийн сургуулилт хийснээс хэдхэн хоногийн дараа АНУ-ын Конгрессийн төлөлөөгч Тайванийн албаныхантай уулзаж, АНУ-Тайванийн харилцааны талаар зөвлөлдсөн билээ. Энэ үеэр төлөөлөгч, Конгресс дахь Тайванийн асуудлыг эрхэлсэн Энди Барр “Тайванийн хоолой дахь статус кво, энх тайвныг хамгаалах тал дээр ямар нэгэн байдлаар эргэлзэх эсвэл үл итгэх шаардлагагүй” хэмээн хариуцлагатай мэдэгдсэнийг Ассошейтэд Пресс уламжилсан. Ерөнхийлөгч Ж.Байден ч АНУ нь хэзээд Тайванийг хамгаална гэж дахин, дахин мэдэгдсээр л байгаа.

Лондон дахь Эзэн хааны коллежийн Лау хятадын хүрээлэнгийн захирал Керри Браун Business Insider-т мэдээлэхдээ “Ши Жинпин АНУ-ыг урхи тавилаа гэж буруутгасан нь сүүлийн үед америкчуудын үзүүлж буй хэт түрэмгий үйлдэлд үнэнхүү гайхаж, цочирдсондоо үзүүлсэн хариу үйлдэл гэж тайлбарлажээ. АНУ-ын талынхан ч сүүлийн үед Тайванийг “шинэ Украйн”-тай зүйрлэх нь олширсон дипломат аргаар шийдвэрлэх зайлшгүй шаардлагатай асуудал болж байна гэж К.Браун цааш нь ярьсан байна.

Д.Трампын засаг захиргаанд Төрийн нарийн бичгийн дарга байсан Майк Помпео, Үнэсдний аюулгүй байдлын зөвлөх Жон Болтон нарын хүмүүс ч асуудлыг түрэмгий хүч ашиглан шийдвэрлэхийг уриалж байгаа билээ. Энэ бол БНХАУ-ын талд ноцтой бэрхшээл. Хэрээс хэтэрсэн хэрэг бөгөөд сэргийлэх арга хэмжээ авах шаардлагатайг олон улсын ажиглагчид анхааруулсаар л байна.

Дээр дурдсан өнгөрсөн дөрөвдүгээр сарын уулзалтын үеэр Хятадын Гадаад хэргийн сайд Ван И тус улсын тусгаар тогтнол, аюулгүй байдал, хөгжлийн ашиг сонирхолд хөндлөнгөөс хэт халдахгүй байхыг АНУ-ын Төрийн нарийн бичгийн дарга Энтони Блинкенд анхааруулсан. Энэ нь Ши Жинпиний барууны орнуудыг ятгаж, АНУ-ын түрэмгий авирыг аргадаж өгөхийг гуйсан гомдол байсан гэж 2000-2003 онд Бээжин дэх Их Британийн элчин сайдны яамны нэгдүгээр нарийн бичгийн даргаар ажиллаж байсан Керри Браун тайлбарлаж байна.

Ядаж байхад өнгөрсөн долоо хоногт Номхон далай дахь АНУ-ын флотын адмирал Самуэль Папаро “АНУ Тайванийн арал орчимд олон мянган алсын удирдлагатай дроныг бэлэн байдалд тараан байрлуулах шаардлагатай. Хятадууд Тайвань руу довтолсон үед хамгаалах бүс үүсгэж, АНУ-ын цэргүүдийг байлдааны бүсэд иртэл хугацаа хожиж өгнө” гэж Вашингтон Постод ярьсан нь гал дээр тос нэмснээс өөрцгүй явдал боллоо гэж ажиглагчид анхааруулав.