Германы холбооны улсын дотоод хэргийн яамд кибер дээрэлхэлтэй тэмцэхийн тулд буруутай этгээдэд эрүүгийн хариуцлага хүлээлгэдэг болгох хуулийг тус, тусдаа өргөн мэдүүлэх эсэх дээр судалгаа хийж буй талаар мэдээлжээ. Берлин хотын ойролцоох Потсдам хотод өнгөрсөн долоо хоногийн лхагваас баасан гарагт болсон дотоод хэргийн яамны сайд нарын уулзалтын үеэр уг хуулийн төслийг танилцуулсан байна. Кибер ертөнцөд дээрэлхэх үзэгдэл түгээмэл болсон ч албаныхан төдийлөн ойшоож үзэхгүй байгаа нь бодит амьдрал дээрх хохирогчдод ноцтой аюул авч ирж байна гэж Бранденбургийн Дотоод хэргийн сайд Михаел Штубген анхааруулав. Дотоод хэргийн сайд нар дээрх саналыг дэвшүүлснээр эхлээд хууль зүйн сайд нар хэлэлцэх журамтай юм байна. М.Штубген хэдэн сарын өмнөөс кибер ертөнц дэх дээрэлхэх үзэгдлийн гол хохирогчид нь хүүхэд, эмэгтэйчүүд бөгөөд төрийн албан хаагчид, сонгуулиар сонгогдсон төлөөлөгчдөд чиглэсэн төрөл бүрийн заналхийлэл аюултай хэмжээнд хүрсэн гэж ярьсаар ирсэн юм. Харин Германы Дер Шпигель сонинд Холбооны Хууль зүйн яамнаас одоо хүчин төгөлдөр үйлчилж байгаа эрүүгийн хууль кибер танхайчуудыг хангалттай шийтгэчих хэмжээний зохицуулалттай гэж мэдэгдсэнийг уламжилжээ. Гэхдээ дээрх кибер дээрэлхлийн эсрэг хуулийг тусад нь баталснаар Европын холбооны өгсөн чиглэлийн дагуу эмэгтэйчүүд болон гэр бүлийн хүчирхийлэлтэй тэмцэхэд дэмжлэг болно гэж албаныхан онцолж байгаа юм.