Ирэх арваннэгдүгээр сард болох АНУ-ын Ерөнхийлөгчийн 60 дахь сонгуулийн угтсан улс төрийн дуулиан шуугиан тасрахгүй байна. Тус улсын одоогийн Ерөнхийлөгч Жо Байдений 54 настай хүү Хантер Байден 2018 онд галт зэвсэг худалдаж авах үеэрээ хар тамхи хэрэглэсэн байсан гэх Бүгд найрамдах намынхны гомдлын дагуу түүний хэргийг шүүх хурал Делавейрийн Дээд шүүхэд болох гэж байгаа билээ. Тэгвэл Ерөнхийлөгчид хоёр дахиа нэр дэвшээд буй экс Ерөнхийлөгч Дональд Трамп саяхан Фокс Ньюс сувгийн Ханнитигийн ярилцлагад орох үеэр хүү Байдений талаарх хөтлөгчийн асуултанд хариулжээ. Тэр хар тамхинд донтсон Хантер Байденийг их өрөвддөг гэж яриад архи, тамхи, хар тамхинаас гарах, донгоос салах маш өвөрмөц мөртлөө хамгийн найдвартай аргыг зааж өгсөн байна. Мөн тэрбээр энэ аргаа “Хамгийн энгийн” гэж тодотгов. Дональд Трамп уг зөвлөгөөгөө өгөхийн өмнө архи, тамхи, хар тамхины хар гайгаар дүүгээ алдаад зогсохгүй олон найз нөхдөө бурханы орон руу явуулсан гэж амьдралынхаа хар бараан хэсгээс дурсжээ. Ингээд Дональд Трампын хорт зуршлын донгоос салах зөвлөгөөг хүргэхэд ердөө л аливаа зүйлийн амтанд дасахгүй байх гэнэ. Жишээ нь, түүнийг коллежид байх үед нэг найз нь виски ууж чаддаггүй байсан ч ажил, нийгмийн харилцааны шаардлагаар бага, багаар амссаар амтанд нь орж, эцэстээ архинд донтон гудамжны архичин болж, нас барсан аж. Тиймээс Д.Трампын зөвлөгөө бол “Архи, тамхи, хар тамхийг хэрэглэж үзээгүй бол тэр талаар бодох ч хэрэггүй. Нэг ч болов удаа амсаж үзэж болохгүй. Амссаар байвал амтанд нь орж, улмаар донтож, амьдрал нь сүйрнэ. Тиймээс дургүй зүйлдээ дасах хэрэггүй” юм байна.