SpaceX компанийн Starship аварга пуужингаа өчигдөр дөрөв дэхээ туршиж, хөөргөх ажиллагаа амжилттай болсноор хүн төрөлхтнийг Ангараг гараг руу тээвэрлэх өдөр нэг алхмаар наашиллаа. Пуужинг Техасын өмнөд эргээс хөөргөж, сансрын уудамд гаргаад буцаж дэлхийн агаар мандалд орж ирээд төлөвлөсний дагуу Энэтхэгийн далайд зөөлөн газардсан байна. Энэ оны гуравдугаар сард болсон өмнөх туршилтаар уг пуужин дэлхийн агаар мандалд орж ирж чадсан ч удалгүй дэлбэрч бүтэлгүйтсэн юм. СпейсИксийн захирал Элон Маск “Халахаас хамгаалах бүрхүүлүүдийн нэлээд хэсэг нь салж, хурд сааруулагч гэмтсэн ч Starship хөлөг далайд зөөлөн бууж чадлаа” гэж сошиал хуудсандаа мэдээлжээ.

Хүн төрөлхтний түүхэндээ бүтээсэн хамгийн том пуужин болох 122 метр урт Starship нь Super Heavy хурдасгуур болон түүний оройд бэхлэгдсэн Starship сансрын хөлөг гэсэн хоёр хэсгээс бүрддэг аж.