Итали бол эртний Ромын тоо томшгүй балгад, түүхэн дурсгалаараа алдартай газар боловч тэдгээрийг бүрэн бүтнээр нь хамгаалах нөхцөл өнөө цагт ч хомс. Түүхэн эд өлгийн зүйлс, барилга байгууламжууд зочин вандалистуудын хорон гарт үрэгдэх тохиолдол их байдгийн нэг жишээ нь Няполь хотын ойролцоо, Везуви галт уул дэлбэрэх үед үнс нурманд дарагдсан ч хожим малтаж гаргасан ханан дээр эрээчсэн хэрэг өчигдөр гарчээ. Өдгөөгөөс 2000 жилийн өмнө үнс, лаванд дарагдсан Помпей хотын ах гэгддэг Геркуланеум хотын балгасыг үзэж явсан Нидерланд улсын 27 настай жуулчин хэргийн эзэн байж таарав. Орон нутгийн цагдаагийнхан эртний Ромын ханан дээр хар өнгийн тодруулагчаар сараачиж, гарын үсгээ үлдээсэн сахилгагүй жуулчинг богино хугацаанд илрүүлэн баривчилжээ. Нэрийг нь нууцалсан жуулчинг нотлох баримтын хамт шүүх байгууллагад хүлээлгэж өгсөн бөгөөд эртний түүхийн дурсгалыг гутаан доромжилсон хэрэгт буруутган 43,000 долларын торгох ял оноожээ.

Сүүлийн жилүүдэд сахилгагүй жуулчдын саваагүйтэх явдал Италид олширч байгаа гэж Ройтерс мэдээлж байна. Жишээ нь, өнгөрсөн оны зургаадугаар сард Их Британийн иргэн түлхүүр ашиглан алдарт Колизейн ханан дээр өөрийнхөө болон найз бүсгүйнхээ нэрийг сийлж байгаад баривчлагджээ. Мөн оны наймдугаар сард нэгэн графит зураач Милан хот дахь Хоёрдугаар Галлериа Витторио Эмануелийн хөшөөг эрээчиж байгаад баривчлагдсан байна. Хэрэв та Итали руу аялахаар төлөвлөж байгаа бол түүхэн дурсгалт барилга байгууламжийн хана, хөшөө дурсгал дээр ямар нэгэн байдлаар сараачвал дээр дурдсан хэмжээний мөнгөн торгууль төлөхөөс гадна хагас жилээс дээш хэмжээгээр шоронд хоригдох ялтайг бүү мартаарай!