Олон улс ярилцаж, хэлэлцсэнээр дэлхийн агаарын температурыг Цельсийн 1.5 градусаар нэмэгдэхээс сэргийлэхэд хатуу түлшийг хэрэглээнээс шахах нь ач холбогдолгүй гэж Арабын Нэгдсэн Эмирт Улсын хамгийн том газрын тосны компанийн захирал Цаг уурын өөрчлөлтийн эсрэг чуулганд оролцогсдыг загнажээ. НҮБ-ын цаг уурын элч Мэри Робинсоны оролцож буй СОР28 чуулганыг даргалагч Султан Аль Жабер дээрх мэдэгдлийг хийж, хурц шүүмжлэлд өртөөд байгаа юм. Түүний хэлсэн үгийн ашиг сонирхол тун тодорхой. Ойрх Дорнодын хамгийн том өрөмдлөгийн компани “Аднок”-ын захирал тэрбээр үйл ажиллагаагаа өргөжүүлж, өрөмдлөгийн талбайгаа тэлэхээр ажиллаж байгаа нэгэн юм. Улмаар газрын тос болон байгалийн хийн олборлолтоор дэлхийд тэргүүлэгч болох санаархалтай буй аж.

Аль Жабер цааш нь ярихдаа “Нэгэнт хатуу түлшийг хэрэглээнээс шахан гаргаснаар цаг уурын өөрчлөлттэй бодитой тэмцэж чадахгүй учир би хоосон түгшигчдийн тоонд багтмааргүй байна. Хатуу түлш агаарын температурыг өсгөж байгаа гэх шинжлэх ухааны тайлбар байхгүй. Барууны хэвлэлийн хуурамч мэдээлэлд итгэх хэрэггүй” гэж Дубайд болж буй СОР28-д оролцогчдыг зандарсан байна. Цаг уурын өөрчлөлтийн эсрэг чуулганыг тэргүүлдэг хүн ийнхүү эсрэг байр суурь илэрхийлсэн нь дэлхий даяар сая, сая хүний бодол санааг эргүүлж, үймээн дэгдээх аюултай байж болохыг олон улсын хэвлэлүүд анхааруулжээ.