БНСУ-ын өсвөр насныхны үхлийн шалтгааныг амиа хорлох үйлдэл тэргүүлсэн хэвээр байгаа талаар орон нутгийн албаныхны өчигдөр гаргасан тайланд тусгажээ. Социологичдын 9-24 насныхны дунд явуулсан судалгаагаар 2022 онд амиа алдагсдын 10.8 хувь нь өөрийгөө егүүтгэсэн бол 3.9 хувь нь ослоор, 2.5 хувь нь хорт хавдраар амиа алдсан байна. Энэ нь өнгөрсөн оны мөн үеийнхтэй харьцуулахад 0.9 хувиар буурсан үзүүлэлт ч гэлээ өсвөр насныхны дунд амиа хорлох явдал хамгийн их хэвээр байгаа гэсэн үг юм. Өмнөд Солонгосын хувьд 2012 онд өсвөр насныхан амиа хорлох явдал хамгийн дээд цэгтээ хүрч байсан бол 2021 оныг хүртэл бусад үхлийн шалтгаантай харьцуулахад харьцангуй тогтмол хувьтай байж иржээ. БНСУ-ын Хүйсийн тэгш байдал, гэр бүлийн яамнаас гаргасан дээрх судалгааны дүнгээс харахад дунд болон ахлах сургуулийн сурагчдын 26 хувь нь сэтгэл гутралд орж байсан гэнэ. Гэхдээ энэ нь 2022 онд 28.7 хувьтай байсантай харьцуулахад сайжирсан үзүүлэлт гэж онцолжээ. Бас нэгэн шинэ зүйл анзаарагдсан нь Өмнөд Солонгосын нийт сурагчдын дунд эрлийз сурагчдын тоо өссөн байна. Энэ сарын дунд үеийн байдлаар тус улсын хэмжээнд бага, дунд ахлах сургуулийн 5.21 сая сурагч байдгаас 3.5 хувийг эрлийз сурагчид эзэлж буй аж. Үүнийг арван жилийн өмнөхтэй харьцуулахад гурав дахин өссөн буюу 2013 онд эрлийз сурагчид ердөө нэг хувийг эзэлдэг байжээ. Тэдгээр сурагчдын 63.8 хувь нь бага сургуульд сурдаг юм байна. Гэхдээ БНСУ-ын хэмжээнд сургуулийн насны иргэд буюу 6-21 насныхны тоо буурч өнгөрсөн 2023 онд 7,302,000 сая байсан бол өнөөдрийн байдлаар 7,140,000 болжээ.