Цөмийн бөмбөгийн туршилт хийж, үе үе дэлхий дахиныг чичрүүлдэг БНАСАУ өчигдөр тагнуулын хиймэл дагуул хөөргөсөн боловч удалгүй дэлбэрч бүтэлгүйтсэн байна. Тус улсын удирдагч Ким Чен Ун АНУ болон БНСУ-ын үйл ажиллагааг тандан турших зорилготойгоор олон тооны тагнуулын хиймэл дагуул хөөргөхөөр төлөвлөсний хоёр дахь нь байлаа. Пуужинг хөөргөхөөс хэдхэн цагийн өмнө БНСУ, БНХАУ, Японы тэргүүлэгчид сүүлийн дөрвөн жилд анх удаа гурван талт уулзалт зохион байгуулаад байсан юм. Ялангуяа БНАСАУ-ын мөнхийн түнш гэгддэг БНХАУ нь бүс нутгийн хэмжээнд дээд хэмжээний дипломат ажил зохион байгуулж, байгалийн хийн хоолойн асуудлыг хөндөж буй энэ үед Пхеньян пуужин хөөргөсөн нь тун хачирхалтай үйл явдал байв. Алсын зайн пуужингийн туршилт удаа дараа хийж, НҮБ-ын хоригт орсон Умард Солонгос ийнхүү тагнуулын хиймэл дагуул хөөргөсөн нь түүний хөрш зэргэлдээ орнуудын шүүмжлэлийг хүртээд байгаа юм. Умард Солонгосын төрийн мэдлийн KCNA мэдээллийн агентлагийн мэдээлснээр пуужин хөдөлгүүрийн эвдрэлийн улмаас хөөрмөгцөө дэлбэрсэн гэжээ. Мөн тус улсын Агаар сансрын технологийн газрын тэргүүний тайлбарласнаар пуужинг цоо шинэхэн шингэн хүчилтөрөгчийн шатахуунтай хөдөлгүүрээр тоноглосон байжээ.