Таван мм-ээс бага хэмжээтэй, нүдэнд үл үзэгдэх шахам  хуванцар хэсгүүд өдгөө дэлхий даяар хаа сайгүй тархсан бөгөөд дэлхийн хамгийн өндөр уулсын мөсөн оргилоос эхлээд далайн гүн хүртэлх бүх газраас илэрч байна. Эдгээр хэсгүүд нь байгаль орчин болон хүн амын эрүүл мэндэд аюул учруулж болзошгүйг судалгаанууд анхааруулж байгаа юм.

Тухайлбал, тэдгээр нь хүн болон бусад амьтны биед үрэвсэл үүсгэх, ДНХ-г гэмтээх, дааврын тэнцвэрийг алдагдуулах эрсдэлтэй болохыг судалгааны үр дүнгүүд харуулж байна. Өмнөх судалгаануудаар Эверест уулын бүс нутгаас цуглуулсан цас болон урсгал усны дээжүүдэд хуванцрын бичил хэсгүүд (микропластик) илэрч байсан.

Гэвч дэлхийн хамгийн өндөр оргил яг хэр хэмжээгээр микропластикийн бохирдолд өртөж байгаа нь тодорхойгүй хэвээр байв. Тэгвэл тус уулын хойд энгэрт хэдэн сарын турш ажиглалт хийсэн шинэ судалгаагаар, Эверест уул руу агаараар дамжин микропластик болон нанопластик хэсгүүд жилийн турш тасралтгүй орж ирдэг болохыг тогтоожээ. Төвөдөд байрлах, өндөр уулын судалгааны төв болох "Жомолунгма станц" өдөрт нэг метр квадрат талбайд 64 ширхэг бичил хуванцар (microplastic) хуримтлагдаж байгааг илрүүлсэн байна. Харьцуулж үзвэл, Эверестийн үндсэн баазад (Everest Base Camp) өдөрт нэг метр квадрат талбайд 23 ширхэг хуванцар илэрчээ.

Тус газарт илэрсэн хуванцар хэсгүүдэд голчлон полиамид, полиэтилен терефталат, полиэтилен зэрэг бодисууд багтаж байв. Мөн Эверестийн үндсэн баазтай (Everest Base Camp) харьцуулахад "Чомолунгма" станцад (Qomolangma Station) илүү жижиг хэмжээтэй нано хуванцар бөөмс, тухайлбал полиэтилен, полиэтилен терефталат, поливинил хлорид, полипропилен зэрэг бодисууд бороо болон цас орох үед илүү их хэмжээгээр илэрсэн байна.

Хамгийн сүүлийн үеийн судалгаанууд нь хамгийн жижиг хуванцар хэсгүүд ч дэлхийн хамгийн алслагдсан газарт хүрдэг болохыг харуулж байна. Хамгийн чухал нь уг судалгаагаар Эверест зөвхөн уулчид болон аялал жуулчлалаас хуванцар хуримтлуулаад зогсохгүй, агаар мандлын эргэлтээр дамжуулан хуванцар бохирдол хуримтлагдаж буйг харуулж байгаа юм. Судлаачид бороо, цас эсвэл манангаар бохирдуулагч бодисууд гадаргуу дээр буух үйл явц бичил хуванцарын хэмжээг нэмэгдүүлдэг болохыг тогтоожээ.