Монгол Улсын зүүн хязгаар, дэлхийд нэн ховорт тооцогддог Нөмрөг дархан цаазат газарт гарсан ойр хээрийн түймэртэй холбоотойгоор БНХАУ тэргүүтэй хөрш орнууд болон Япон улсын хэвлэл мэдээлэл, олон нийтийн зүгээс хариуцлага нэхсээр байна.

Жишээ нь, БНХАУ-ын төрийн мэдлийн хэвлэл мэдээллийн хэрэгслүүд "Япон Улсын  KDDI компани, түүний охин компани болох, Монгол Улсын үүрэн холбооны оператор "Мобиком" корпорац Хоосон уучлалт гуйсан нь хангалтгүй.  Нөхөн төлбөрийн асуудлыг шийдэх ёстой” хэмээн шаардсан бол Хятадын "Global Times" сонинд мэдээлснээр, гал түймэр хил даван тархахаас сэргийлэхийн тулд Хятад улс "Асар их зардал" гаргаж, 3400 гаруй онцгой байдлын ажилтныг дайчлан, тэд бараг долоо хоногийн турш өдөр, шөнөгүй ажилласан байна. Тус сонины нийтлэлд "Энэхүү хэрэг явдалд холбогдсон Японы компани болон хариуцлага хүлээх ёстой хүмүүс Хятад улсаас  ч уучлалт гуйх хэрэгтэй" хэмээн хариуцлага нэхсээр байгаа юм.  

Тэгвэл Япон Улсаас Монгол Улсад суугаа Элчин сайдын яамнаас түймэртэй холбоотой эмгэнэл илэрхийлж, KDDI болон "Мобиком" корпорацууд түймэр дэгдэхэд оролцсон гэдэг үйлдлээ хүлээн зөвшөөрсөн.

Гэтэл Монгол Улсын Засгийн газар "Мобиком" корпорацаас хариуцлага нэхэхийн оронд тухайн үйл ажиллагаанд оролцсон Хилийн боомтын захиргааны дарга Э.Гантулга, 0198 дугаар ангийн захирагч Б.Гантөгс нарыг чөлөөлөх шийдвэр гаргасан нь олон нийтээс шүүмжлэл дагуулаад байна.
Тэдний ард Халхголын хилийн отрядын бүс заставыг 4G сүлжээнд холбож, Сүмбэр хилийн боомтод шилэн кабелийн холболт нэвтрүүлсэн ажлыг хүлээлгэн өгөх  арга хэмжээнд оролцсон УИХ-ын нэр бүхий гишүүн болон "Мобиком"-ын захирлууд хариуцлага хүлээлгүй үлдэж байгаа. Засгийн газрын ажлын хэсэг тэргүүтэй шалгалтын багийнхны зүгээс анхнаасаа дээрх арга хэмжээнд оролцсон гэж 10 гаруй хүний нэрийг нууцалсан нь ч олон нийтээс шүүмжлэл хүртэх том шалтгаан болоод байгаа юм. Түймрийн хохирлыг тогтоох ажил 30 хоногийн хугацаанд үргэлжилнэ.