Саудийн арабын тэрбумтан Фаваз Аль Хокайр жил бүр Нью-Йорк хотод дээд зэрэглэлийн тансаг орон сууц худалдаж авдгаараа зартай. Түүний үл хөдлөх хөрөнгөд гар үл татах энэ зан орон сууцны үнийг улам бүр хөөргөддөг. Бас түүнийг тансаг пентхаус худалдаж авна гэхээр үл хөдлөх хөрөнгийн зуучид баярлаж, асар их хөнгөлөлт үзүүлдэг нь хачирхалтай. Үл хөдлөхийн цуутай магнат тэрбээр Нью-Йорк хотын Манхеттан дүүргийн Тэрбумтнуудын гудамжинд 105 сая доллараар тус хотын хамгийн үнэтэй пентхаусыг худалдан авчээ. Нийт 732мкв талбайтай, зургаан унтлагын өрөөтэй уг тансаг пентхаус 2021 170 сая доллараар худалдах зар түгээсэн байна. Гэтэл Фаваз Аль Хокайр 2023 онд 130 сая доллараар авах үнийн санал тавьсан ч татгалзсан хариу авчээ. Ингээд дахин нэг жил буюу бүтэн гурван жил залхтал хүлээлгэсний эцэст пентхаусыг борлуулж буй үл хөдлөх хөрөнгийн зуучлагчид тэвчиж чадалгүй 105 сая доллараар худалдахыг зөвшөөрсөн байна. Ингээд Фаваз Аль Хокайр Нью-Йоркийн хамгийн үнэтэй гэх орон сууцыг 65 сая долларын хөнгөлөлттэй үнээр худалдан авч байжээ. Тэрбумтнуудын гудамжны Парк өргөн чөлөөний 432 тоот хаягтай уг байрыг хамгийн анх 2016 онд 87.66 сая доллараар худалдаж байсан юм байна. Пентхаус доторх тавилга, эд хэрэглэл бүгд дээд зэрэглэлийн чанартай “Hermes, Louis Vuitton, Bentley” брендийнх. Гэхдээ хамгийн сонирхолтой нь пентхаусны эзэн Фаваз Аль Хокайр шинэ гэрийнхээ босгоор алхаж орж ч үзээгүй гэнэ.