Их Британийн Үндэсний Статистикийн Газар (ONS) лхагва гарагт гаргасан тайландаа, гэрлэлтээ цуцлуулсан хосуудын хамт амьдарсан хугацаа дунджаар 13 жил байсныг мэдээлжээ.

Энэ нь 1963 онд бүртгэл хөтөлж эхэлснээс хойших хамгийн урт хугацаа бөгөөд 1985 онд бүртгэгдсэн түүхэн доод үзүүлэлт болох 8.9 жилээс нэмэгдсэн үзүүлэлт байна. Гэрлэлт цуцлуулах асуудлаар мэргэшсэн тэргүүлэх хуулийн фирм болох "Clarke Willmott"-ын ахлах хуульч Ребекка Астон-Жонс амьжиргааны өртгийн өсөлт нь сэтгэл ханамжгүй хосуудыг хамт амьдрахад хүргэж байна гэжээ.  Тэрбээр "Хүмүүсийг гэрлэлтээ цуцлуулахаас татгалзахад хүргэж буй гол хүчин зүйлсийн нэг бол тус тусдаа хоёр өрх гэр байгуулж, авч явахад учирдаг санхүүгийн томоохон дарамт юм" гэдгийг онцолсон байна.

Ойрхи Дорнод дахь мөргөлдөөн хурцдаж буйгаас үүдэн инфляци өсөж, түрээс, орон сууцны зээл болон хүүхэд асрах үйлчилгээний зардлыг нэмэгдүүлээд байна. Астон-Жонс "Олон хүн салах тухай бодохдоо санхүүгийн хувьд хүндрэлтэй байдалд орохоос айж эмээдэг нь гайхах зүйл биш" хэмээсэн байна. Үндэсний Статистикийн Газар (ONS)-ын мэдээллээс үзэхэд, жилд 150,000 тохиолдолд хүрч байсан 1980-аад болон 2000-аад оны оргил үетэй харьцуулахад салалт буурчээ.

2025 онд Англи, Уэльсэд нийт 105,002 гэрлэлт цуцлагдсаны дотор эсрэг хүйстний хос 102,879, ижил хүйстний хос 2,123 байв. Ижил хүйстний хосуудын хувьд энэ нь 2014 онд ижил хүйстний гэрлэлтийг хуульчилснаас хойших хамгийн өндөр үзүүлэлт болжээ. Мөн 959 иргэний хамтын амьдралын гэрээ (civil partnership) цуцлагдсаны дотор эсрэг хүйстэн хос 270, ижил хүйстэн хос 689 байсан байна.

ONS-ын хүн амын амьдралын үйл явдлын асуудал хариуцсан дарга Грег Сийли "Сүүлийн жилүүдэд гэрлэлт цуцлалтын түвшин тогтвортой байгаа ч 1980, 1990-ээд болон 2000-аад оны эхэн үеийн оргил түвшнээс доогуур хэвээр байна. Бидний хамгийн сүүлийн үеийн судалгаагаар гэрлэлт эсвэл хамтын амьдралаа цуцлуулж буй хүмүүс харилцаагаа дуусгахаасаа өмнө илүү удаан хугацаанд хамт амьдарч байгааг харуулж байна" гэжээ.

Астон-Жонс "Үүний улмаас зарим хосууд аз жаргалгүй эсвэл таагүй уур амьсгалтай орчинд амьдарсаар байгаа нь холбогдох бүх хүнд сөрөг нөлөө үзүүлж болзошгүй юм. Бид хамтран эзэмшдэг хөрөнгийн давуу талыг хадгалах, өрхийн зардлаа хуваан төлөх зорилгоор тусдаа амьдрах болсон ч нэг дээвэр дор амьдарсаар байгаа хосуудыг түгээмэл харж байна.
Энэхүү зохицуулалт нь ихэвчлэн хурцадмал байдлыг нэмэгдүүлж, гэрт илүү тогтворгүй уур амьсгалыг бий болгодог. Мөн харилцаан дахь санхүүгийн дарамт, хүчирхийлэл (financial abuse) нэмэгдэж байна. Энэ нь хувь хүмүүсийг бие даан санхүүгээ зохицуулах чадвартаа эргэлзэхэд хүргэж, улмаар гэрлэлтээ цуцлах алхам хийхэд саад болж байна” гэжээ.  

"Osbornes Law" хуулийн фирмийн түнш бөгөөд гэрлэлт цуцлалтын асуудлаарх мэргэшсэн хуульч Лиза Пеппер "Сүүлийн 60 жилийн хугацаанд гэрлэлт цуцлуулах үйл явц урьд өмнөхөөсөө илүү хялбар болсон хэдий ч эдгээр гайхалтай тоо баримт нь хосууд хамтдаа амьдрах хугацаагаараа дээд амжилт тогтоож байгааг харуулж байна" гэжээ.