Ундны ус хангамжийн цэгүүд рүү кибер халдлага хийх явдал сүүлийн үед олширч улам л ноцтой болж байна гэж АНУ-ын Хүрээлэн буй орчныг хамгаалах газраас мэдэгдэж, улсын хэмжээнд ундны усны нөөцүүдийг хамгаалах арга хэмжээг яаралтай авах шаардлагатай болж буйг өнөөдөр анхааруулжээ. Холбооны албаныхны өнгөрсөн жил явуулсан шалгалтын үеэр ундны ус хангамжийн цэгүүдийн 70% орчим нь гадны нөлөөлөлд автах стандартыг зөрчсөн байдалтай байна. Бүр бага оврын усан хангамжийн цэгүүдийг ч хакеруудын халдлагаас хамгаалах шаардлагатай болсныг онцлон анхааруулав. Хүн ам багатай газруудыг онилсон кибер халдлагыг ОХУ болон Иранийн талаас үйлдэх нь сүүлийн хэдэн сарын дотор хурдацтай нэмэгдсэнийг холбогдох албаныхан нь тогтоосон гэжээ.

Кибер халдлагын улмаас ус дамжуулах шугам сүлжээг удирдах системийн нууц үг солигдох, ажилчдын нэвтрэх эрхийг хаах зэргээг үйлдэж байгаа нь иргэдийн ундны усны хэрэгцээг байнга тасалдахад хүргэж, улмаар АНУ даяар ундны усан хангамжийн хямралд орох аюултай гэж Хүрээлэн буй орчин хамгаалах газрын дэд дарга Жанет МакКейб анхаарууллаа. Усан хангамжийн төвүүд програм хангамжийн тусламжтайгаар ажилладаг учир ус нөөцлөх, түгээх, сэлгэх дамжлага тасалдаж байгаа тул мэдээлэл технологи, дамжуулах шатны удирдлагын системийг хамгаалах онц шаардлагатай болж байна гэв.

Албаныхны шалгалтын явцад Хятадын хакерийн бүлэглэл ус дамжуулах системд нэвтрээд зогсохгүй, автомат шахуурга, хураагуур зэргийг ч ажиллагаанаас гаргаж, хорлон сүйтгэдэг нь илэрсэн байна. Хятад, Иран, Оросын бүлэглэлүүд АНУ-ын амин чухал дэд бүтцэд ийнхүү идэвхтэй халдаж байгаа нь ундны болон цэвэр, бохир ус дамжуулах шугам сүлжээ бүхэлдээ хямрах, хоорондоо холилдох эрсдэл өндөр байна гэж Ж.МакКейб анхааруулжээ. Мөн түүний нэрлэснээр Иранийн талд ажилладаг “Cyber Av3ngers, ОХУ-ын талд ажилладаг “hacktivist”, Хятадын талд ажилладаг “Volt Typhoon” зэрэг бүлэглэл өнгөрсөн жилээс хойш маш идэвхтэй үйл ажиллагаа явуулж байгаа юм байна.