Гар утас, ажиглах камерийн дуранд өнгөрсөн долоо хоногийн бямба гарагийн шөнө Испанийн тэнгэрт болсон нэгэн үзэсгэлэнтэй гэрлийг бичсэн бичлэг олон нийтийн сүлжээгээр дэлхий даяар тархаж, сая, сая хүний анхаарлыг татаад байна. Эл үзэгдэл Португалын тэнгэрт ч мөн адил үзэгджээ. Хурц ногоон галт бөмбөлөг мэт гэрэл орон нутгийн цагаар 18:46 цагт үзэгдсэнийг Европын сансрын агентлаг бүртгэж авсан гэв. Тус агентлагийнхны нэрлэснээр тэрхүү “гайхамшигт гэрэл” нь манай гарагийн агаар мандалд орж ирээд дэлбэрсэн солироос үүдэлтэй хэмээн Х дахь хаягаараа мэдээлсэн байна.

Харин НАСА-гийн тайлбарласнаар нарны орбитыг даган эргэдэг хөлдүү хий, чулуу, тоосонцроос бүрдсэн сансрын цасан бөмбөг дэлхийн агаар мандалд орж ирсэн нь тэр аж. Сансрын цасан бөмбөлөг нь хэдхэн метрээс өгсүүлээд хэдэн арван км-ийн өргөнтэй ч байж болдог гэнэ. Ийм төрлийн чулуу, мөснөөс бүрдсэн багахан хэмжээний солир нь сүүлт од, томоохон хэмжээний солир, сар болон бусад гаргаас тасран сансрын орон зайгаар тэнүүчлэх үзэгдэл түгээмэл байдаг. Эрдэмтдийн тооцоолж буйгаар Европын тэнгэрт үзэгдсэн тэрхүү үзэсгэлэнт гэрлийн эх үүсвэр болох солир нь цагт 180,000 км-ийн хурдтай нисэж, Атлантын тэнгисийн дээгүүр шатсаар газрын гадаргаас 56 км-ийн өндөрт дэлбэрсэн бололтой. Мөн тэд уг солирын хэлтэрхийг SPMN180524F хэмээн нэрлэсэн байна.