Хөдөлмөр, нийгмийн түншлэлийн гурван талт Үндэсний хорооны хэлэлцүүлгээр хөдөлмөрийн хөлсний доод хэмжээг сард 1,000,000, нэг цагт 5952.3 төгрөгөөр тогтоохоор талууд нэгдсэн шийдэлд хүрлээ.
Энэ нь ажиллагчдын орлого, амьжиргаа, хөдөлмөрийн үнэлэмжийг дээшлүүлэх, нийгмийн даатгалын хамгааллыг бэхжүүлэхэд чиглэсэн чухал алхам юм.
Хөдөлмөрийн хөлсний доод хэмжээг 1 сая төгрөгт хүргэх шийдвэр нь хамгийн бага орлоготой ажиллагчдын цалин, өрхийн худалдан авах чадварыг нэмэгдүүлэхээс гадна хөдөлмөрийн үнэлэмжийг дээшлүүлэх чухал алхам болж байна.
Өнөөдөр Монгол Улсад 1.4 сая орчим хүн хөдөлмөр эрхэлж байна. 2025 оны эхний хагаст нэрлэсэн дундаж цалин 2.7 сая төгрөгт хүрсэн ч цалингийн доод түвшинд ажиллаж буй иргэдийн хувьд орлогын өсөлт, амьжиргааны баталгаа нэн чухал хэвээр байна.
1 сая төгрөгийн доод цалин нь бага орлоготой ажиллагчдын орлогыг нэмэгдүүлж, тэдний өдөр тутмын хэрэглээ, өрхийн эдийн засагт шууд дэмжлэг үзүүлнэ. Нэмэгдсэн орлого нь хэрэглээгээр дамжин худалдаа, үйлчилгээний салбарт эргэлдэж, дотоодын эдийн засгийн идэвхийг дэмжих боломжтой.
Нөгөө талд цалингийн суурь нэмэгдэх нь нийгмийн даатгал, татварын орлогын суурийг өргөжүүлэх эерэг нөлөөтэй. 2025 оны эхний хагаст НДШ-ийн орлого өмнөх оны мөн үеэс 22 хувиар, ХХОАТ-ын орлого 13.2 хувиар өссөн нь цалин, хөдөлмөр эрхлэлтийн өсөлт төсвийн орлоготой шууд холбоотойг харуулж байна.
Тиймээс шударга цалин бол зөвхөн ажилтны асуудал биш. Энэ бол гэр бүлийн амьжиргаа, нийгмийн даатгалын сангийн тогтвортой байдал, дотоодын хэрэглээ, эдийн засгийн өсөлттэй холбоотой нийтлэг асуудал юм.
МҮЭХ ажиллагчдын цалин хөлс, хөдөлмөрийн үнэлэмж, нийгмийн хамгааллыг нэмэгдүүлэх байр сууриа тууштай хамгаалж, гурван талт нийгмийн түншлэлийн хүрээнд 1 сая төгрөгийн хөдөлмөрийн хөлсний доод хэмжээнд хүрэх шийдэлд ажил хэрэгчээр оролцлоо.