Өмнөд Африкийн Засгийн газраас Израиль улсын эсрэг Олон улсын шударга ёсны шүүхэд гаргасан геноцидийн гэмт хэргийн эсрэг заргыг дэмжих байр суурь баримтална гэж Египетийн Засгийн газар өчигдөр мэдэгджээ. Энэ нь Израилийн талаас Газын зурвасын өмнөд хэсэгт орших, Египеттэй хил залгаа Рафах хотод цэргийн ажиллагаа явуулсанд унтууцаж буйгаа илэрхийлсэн явдал боллоо гэж дэлхийн томоохон хэвлэл, мэдээллийн агентлагууд онцолж байна. Египетийн Гадаад хэргийн сайд дээрх мэдэгдэлдээ “Израилийн тал Газын зурвасыг түрэмгийлэх ажиллагааг өргөн хүрээтэйгээр явуулж, палестинчуудын эсрэг системчилсэн халдлага үйлдэж, энгийн иргэдийг онилж, дэд бүтцийг устгаж буй нь хүмүүнлэгийн хямрал мөн” гэж хурцаар шүүмжлэв.

Өмнөд Африкийн Засгийн газраас Израиль улсыг Газын зурваст Геноцидийн конвенцийг зөрчсөн гэж үзээд Олон улсын шударга ёсны шүүхэд хүн төрөлхтнийг аймаглан устгасан гэх үндэслэлээр зарга мэдүүлээд байсан юм. Харин Тель-Авивын зүгээс өнгөрсөн оны аравдугаар сарын 07-ны өдрөөс эхлэн явуулсан Хамасын экстремист халдлагын хариуд өөрийгөө хамгаалсан учир геноцид үйлдсэн зүйлгүй хэмээн эрс үгүйсгэсэн хариу өгсөөр байгаа юм.