Генийн инженерчлэлийн аргаар гаргаж авсан гахайн бөөр шилжүүлэн суулгасан өвчтөн 62 настай Рик Слеймэн өчигдөр нас барсан талаар түүний ар гэрийнхэн хэвлэлд мэдээлжээ. Р.Слейман нь өнгөрсөн гуравдугаар сарын 16-нд АНУ-ын Массачуссетс мужийн Төв эмнэлэгт дээрх түүхэн хагалгааг хийлгэж, энэ төрлийн хагалгаанд орсон дэлхийн хамгийн анх хүн гэгдэж байсан билээ. Эмнэлгийн албаныхан өвчтөний хувийн нууц гэх шалтгаанаар түүний хэрхэн нас барсан талаарх дэлгэрэнгүй мэдээлэл өгөхөөс татгалзжээ. Тиймээс Р.Слейманий нас барсан шалтгаан эрхтэн шилжүүлэн суулгасантай холбоотой эсэхийг тодорхойлон хэлэх боломжгүй байна.

Рик Слейман нь тус улсын Тээврийн яаманд менежерээр ажилладаг байсан бөгөөд бөөрний архаг дутагдалд орсоны улмаас эрхтэн шилжүүлэн суулгах шаардлага гарсан. Орчин цагийн шинжлэх ухаанд эрхтэн шилжүүлэн суулгах технологи хурдацтай хөгжиж байгаа учир шинээр бий болсон генийн инженерчлэлийн гаргаж авсан гахайн бөөрийг шилжүүлэн суулгаж, туршиж үзэхээр шийдсэн юм. Р.Слейман нь 2018 онд хүн донороос бөөр шилжүүлэн суулгасан ч дахин хурц дутагдалд орж байсан юм байна.