Зүүн Азийн хүн амын тоо буурах үзэгдэл үргэлжилсээр Японд эзэнгүй хаягдсан байшин, орон сууцны тоо есөн саяд хүрсэн нь АНУ-ын Нью-Йорк хотын хүн амаас ч давсан тоон үзүүлэлт юм. Ийнхүү хаягдсан орон сууцнуудыг Японд “акияа” гэх ба гол төлөв хотын захын болон хөдөөгийн нутгаар түгээмэл болоод байсан бол сүүлийн үед Токио, Киото гэх мэт томоохон хотод олшрох болжээ. Жилээс жилд төрөлт багасах, хүн амын дунд ахмад настны тоо зонхилох болсон Японд  акияанууд олширсоор буй нь тус улсын Засгийн газрын толгойн өвчнийг нэмж байна. Чиба муж дахь Олон улсын судалгааны Кандагийн сургуулийн лектор Жеффри Холл “Японы хүн ам огцом буурахын шинж тэмдэг ийнхүү илэрч байна. Үүнээс олон тооны шинэ орон сууц барихаас илүүтэйгээр хүн ам нь хүрэлцэхээ болих том бэрхшээл үүсэж байна” гэж цохов.

Японы Дотоод хэрэг, харилцан холбооны яамнаас гаргасан статистикаар тус улсын нийт орон сууцны 14% эзэнгүй хаягджээ. Үүний удаах шалтгаан бол япончууд хилийн чанадад хөдөлмөр эрхлэх нь огцом нэмэгдсэнтэй холбоотой юм байна. Эзэнгүй хаягдсан байшин, орон сууцнуудын дийлэнх нь хэдэн үе дамжин амьдарч ирсэн байх бөгөөд төрөлт буурснаар ганц бие өндөр настангуудын эзэмшлийн үл хөдлөх хөрөнгийг өвлөн авах хүнгүй болж буй хамгийн ихээр санаа зовоосон бэрхшээл болж буйг социологичид анхааруулж байгаа юм. Судлаачдын хийсэн тооцоогоор Японы хүн амыг хэвийн хэмжээнд барихын тулд жилд 2.1 сая шинэ иргэн хэрэгтэй боловч өнөөгийн байдлаар жилд 1.3 сая ээж амаржиж байна. Үүний нөлөөгөөр сүүлийн 43 жилийн турш 15-аас доош насны хүүхдийн тоо буурсаар өнгөрсөн дөрөвдүгээр сарын нэгний байдлаар Япон улсад 15-аас доош насны 14 сая хүүхэд байж гэнэ.