Их Британийн Бристолын их сургуулийн эрдэмтэд суперкомпьютер ашиглан цаг уурын нөхцөл байдлыг тодорхойлох судалгаа хийж, дэлхийн ирээдүйн төсөөллийг буулгасан байна. Үр дүн нь тийм ч баярлахуйц биш аж. Суперкомпьютерийн гаргасан тооцооллоор ирээдүйд дэлхий дээр хөхтөн амьтад устаж, 65 сая жилийн тэртээх үлэг гүрвэлүүдийн мөхлөөс хойшх хамгийн том сүйрэл ирнэ. Гэхдээ нэг олзуурхууштай зүйл бол халуун гэж онцлоод буй галав нь 250 сая жилийн дараах ирээдүйд юүлнэ. Гэсэн ч өнөө цагт дэлхий, байгаль эхээ хайрласаар байх хэрэгтэйг эрдэмтэд зөвлөлөө.

“Nature Geoscience” сэтгүүлд гарсан нийтлэлээс үзэхэд цаг уурын нөлөөгөөр 250 сая жилийн дараа дэлхий халуун, хуурай, бараг л амьдралгүй нэг том супер тив болж хувирч, галт уулсын дэлбэрэлтээс их хэмжээний СО₂ агаар мандалд цацагдсанаар халуун тамын адил нөхцөл байдал үүсэх аймшигтай дүр зураг үзэгджээ. Тухайн үед агаарын температур өдөр тутамдаа Цельсийн 40-50 градуст хүрч хоол хүнс, усны нөөц шавхагдаж, хүн төрөлхтөн төдийгүй хөхтөн амьтад хөлс ялгаруулж, биеэ сэрүүцүүлэх чадамжгүйн улмаас мөхөх бололтой. Хэдийгээр гамшигт ирээдүй хүлээж байгаа ч гэсэн хуурай газрын 8-16% амьдрал тэтгэх боломжтой хэвээр үлдсэнээр цөөн төрлийн хөхтөн амьтан мөхлөөс аврагдах боломжтой.

Сонирхуулахад, 2010-аад оны эхээр олон улсын эрдэмтдийн хамтран явуулсан судалгаагаар тун удахгүй буюу 200 орчим жилийн дараа дэлхий дэр бага мөстлөгийн эрин эхэлнэ гэсэн тооцоо гаргасан бөгөөд өнөөдөр дэлхий дээр мэдрэгдэх болсон цаг уурын өөрчлөлт нь түүний урьтал шат юм гэж тайлбарлаж байсан билээ.