Нийгмийн даатгалын ерөнхий газрын дарга Б.Батжаргал болон холбогдох газрын дарга нар 2025.04.03-ны өдөр Авлигатай тэмцэх газрын Авлигатай тэмцэх үндэсний хөтөлбөрийг хэрэгжүүлэх хэлтсийн дарга эрхэлсэн комиссар М.Даваатогтох, Ахлах мөрдөгч, ахлах комиссар Э.Мөнхцэнгэл, комиссар Г.Уянга нартай уулзлаа.

Уулзалтаар Капитал банк 104.2 тэрбум төгрөгийн өр барагдуулах, нийгмийн даатгалын санд төвлөрүүлэх Шүүхийн шийдвэр гарснаас хойш өнөөдрийн байдлаар 38.8 тэрбум төгрөгийг барагдуулж нийгмийн даатгалын санд буцаан төвлөрүүлээд байгаа асуудлыг ярилцлаа.

Мөн цаашид 65.4 тэрбум төгрөгийн үлдэгдэлтэй байгаа тул дээрх банкны өөрийн болон зээлийн барьцаанд байгаа нуугдмал хөрөнгийг олж илрүүлэн нийгмийн даатгалын санд учирсан хохирлыг арилгах, өр төлбөрийг бүрэн барагдуулах чиглэлээр идэвхтэй хамтран ажиллахаар тохиролцлоо.

Нийгмийн даатгалын ерөнхий хуульд заасны дагуу 2024 оны 11 дүгээр сард Нийгмийн даатгалын үндэсний зөвлөлийн шийдвэрээр хараат бус Мэргэжлийн хороо, Олон нийтийн хяналтын зөвлөлийг анх удаа байгуулсан.

Энэхүү хараат бус Мэргэжлийн хорооноос гаргасан дүгнэлтэд үндэслэн Нийгмийн даатгалын үндэсний зөвлөлийн хурлаар /2025.02.24/ нийгмийн даатгалын сангийн чөлөөт үлдэгдэл 700 тэрбум төгрөгийг Монголбанкнаас тодорхойлсон системийн нөлөө бүхий арилжааны банкуудад хугацаатай хадгаламж хэлбэрээр байршуулахаар шийдвэрлэсэн. Энэ шийдвэрийн талаар болон нийгмийн даатгалын сангийн мөнгөн хөрөнгийг цаашид эрсдэлгүй, үр дүнтэй удирдах чиглэлээр санал солилцлоо.