Төсвийн байнгын хороо, Байгаль орчин, хүнс, хөдөө аж ахуйн байнгын хорооны хамтарсан өнөөдөр /2025.11.25/-ийн хуралдаанаар алслагдсан бүс нутгийн хүн амын гол нэрийн бүтээгдэхүүний нэг болох  улаан буудайн гурилын хангамж, нөөц тасалдахгүй байх, байгаль цаг уурын нөхцөл байдлаас шалтгаалсан малын тэжээлийн хомсдол үүсэж болзошгүй хүндрэлийг даван туулахад дэмжлэг үзүүлэх “Тогтоолд нэмэлт оруулах тухай” УИХ-ын тогтоолын төслийг хэлэлцэх эсэхийг дэмжлээ. 
Баруун бүс нутагт  байгаль цаг уурын нөхцөл байдлаас шалтгаалан 2025 онд баруун бүсийн хэмжээнд хур тунадас бага, гантай байснаас улбаалан байгалийн хадлан, өвс тэжээлийн гарц муу, улаан буудайн тариалалт өмнөх жилээс харьцангуй бага байх төлөвтэй зэрэг тариалангийн үйлдвэрлэлийн бодит нөхцөл байдалд тулгуурлан улаан буудайн гурил, мал амьтны тэжээл, тэжээлийн нэмэлтийн хангалт нийлүүлэлт тухайн бүс нутагт доголдох нөхцөл байдал үүсэж болзошгүй байгаа талаар салбарын сайд мэдээллээ. 
Нөхцөл байдалтай холбогдуулан УИХ-ын нэр бүхий 64 гишүүнээс Баян-Өлгий аймгийн Цагааннуур, Ховд аймгийн Яарант, Увс аймгийн Боршоо, Завхан аймгийн Арцсуурь, Говь-Алтай аймгийн Бургастай боомтоор улаан буудайн гурил, малын тэжээл, тэжээлийн нэмэлтийг импортлох боломжоор хангаж, гаалийн албан татвараас чөлөөлж, иргэдэд бодитой дэмжлэг болгохыг хүссэн санал гаргасан байна. Иймд хөдөө аж  ахуйн салбарт үүссэн бодит нөхцөл байдлыг харгалзан  үзэж алслагдсан бүсийн хүн амын гол нэрийн бүтээгдэхүүний нэг болох  улаан буудайн гурилын хангамж, нөөц тасалдахгүй байх, байгаль цаг уурын нөхцөл байдлаас шалтгаалсан малын тэжээлийн хомсдол, үүсэж болзошгүй хүндрэлийг даван туулахад тухай бүр Засгийн газрын хүрээнд шийдвэр гаргах нөхцөлийг бүрдүүлэх шаардлагатай тул Монгол Улсын Их Хурлын тогтоолын төслийг боловсруулан өргөн барьжээ. 
Тогтоолын төсөлтэй холбоотой байнгын хорооны гишүүд асуулт асууж саналаа хэллээ. Баруун бүс нутагт сүүлийн хоёр жил дараалан өвөлжилт хаваржилт хүндэрсэн, ган зудтай байгаа тул тэжээлийн ургамлын тариалалтыг салбар яамнаас дэмжих шаардлагатай талаар хэлж байв.