Монгол Улсад тогтвортой, жилийн дөрвөн улиралд ногоо бэлтгэн нийлүүлэх боломжийг бүрдүүлэх замаар хүнсний аюулгүй байдал, хөдөө аж ахуйн тогтвортой байдлыг хангах зорилготой Үндэсний ухаалаг хүлэмжийн цогцолборын шавыг тавилаа. Уг төслийг Хүнс, хөдөө аж ахуй, хөнгөн үйлдвэрийн яам, Хүнс, хөдөө аж ахуй, хөнгөн үйлдвэрийн судалгаа хөгжлийн төв, Хангён үндэсний их сургууль, Солонгосын хөдөө аж ахуйн хамтын ажиллагааны газар хамтран 2025-2029 онд хэрэгжүүлэх юм.

Ухаалаг хүлэмжийн цогцолборыг Баянзүрх дүүрэг, 11 дүгээр хороонд байгуулах бөгөөд төслийн төсөв ойролцоогоор 3.42 сая ам.доллар байх юм. 

Ухаалаг хүлэмжийн цогцолбор нь дараах үндсэн хэсгүүдээс бүрэлдэх юм. 

-Хүнсний ногооны судалгааны төв-Сургалтын танхим, хүнсний ногоо боловсруулах цех, бараа материалын агуулах, оффис өрөө гэх мэт

Ухаалаг хүлэмжийн цогцолбор-Дэвшилтэт болон дунд технологийн хүлэмжүүд, босоо тариалангийн контейнер, хойд бүсийн хүлэмжүүд, ил талбайн ухаалаг аж ахуй, хөдөө аж ахуйн технологийн парк

Төслийн хүрээнд ухаалаг хүлэмжийн аж ахуй эрхлэх, тариалалтын технологийн онолын сургалтуудыг орохоос гадна онол болон талбайн сургалтыг үе шаттай явуулан мэргэжилтэн, судлаач, тариаланчдад зориулсан уулзалт, семинарыг жил бүр зохион байгуулна.

Уг төсөл хэрэгжсэнээр хөдөө аж ахуйн технологийн чадавх нэмэгдэж, хүнсний ногоог жилийн турш тогтвортой үйлдвэрлэх бааз суурь бүрдэнэ гэж үзэж буй. Мөн тариаланчдын орлого нэмэгдэж, орон нутгийн эдийн засаг сэргэх, уур амьсгалын өөрчлөлтөд дасан зохицсон газар тариалангийн технологи нэвтрэх юм.